Ua viia e le toatele le agaga lotomaualalo ma le onosai o se alii avepasi Samoa i Melepone, Vitoria na osofai e ni tamaitai palagi se toalua i le pitonuu o Dandenong. O le suafa o lenei tamā o Faavae Tuiloma ma na afua le vevesi ina ua lē totogia pasese o nei fafine papalagi ma ia saunoa atu i ai i le aofai o le pasese ae amata osofai ai loa i le faatinoina o lana galuega.
Ua molia nei i le tulafono nei fafine lē mafaufau sa o la lafo upu mamafa ma taufaafefe aemaise le faailogalanu ia Faavae Tuiloma. Na sosoo ai ma lo la faaoolima i le alii avepasi a o saofai i lona nofoa e faafoe le faigamalaga.
E lē gata i lea sa o la faaleagaina foi meatotino o le pasi lea e totogi ai pasese aemaise lo la feanu (tulou) i lenei tamalii Samoa. Na vaaia i le meapueata o le pasi le tulai i luga o Faavae Tuiloma e puipui o ia mai tu‘i a nei fafine a o taumafai le isi e ati ma u lona vae. O le isi sa ia u ma ati taailima taumatau o si avepasi a o vaovao lo la feita.
Ua vaaia foi le toatamai o tagata Samoa i Vitoria ma isi setete ma atunuu i luga o upega tafailagi i le tufanua o nei papalagi. O loo faamalo mai foi i le loto onosai o le avepasi auā e lē faapea uma le lava papale o isi uso a faigaluega Samoa semanu e matuā mafatia ai nei palagi e toalua. O le susuga a Faavae Tuiloma o se epikopo i lana ekalesia mo le lima tausaga ma ua ia faamagalo ia i laua.
E lei umi atu foi se faalavelave faapea na faifai ai ma faailogalanu nisi o papalagi tama talavou i se tama Aferika e galue i luga o nofoaafi i Brisbane faapea ni tamaitai sa faia se sauniga faapenei i luga o se pasi i nai nisi tagata e lē o ni papalagi.
