Ua lalaga le vaa o manū, auā o le vaa sa fauao, faupo, na molimolia foi i talosaga a o alofaiva i se ‘ai mo le Atua ma Lona finagalo. Poo fea lava e oo i ai suataga o le vaatele i le olaga nei, ae taula lava le soifua tulimatai o le Kerisiano i le sailiili loloto i le finagalo o le Matai sili i le lagi.
Na leai se seu na toe lagavale a o tau vavala a‘e ata ma mālama auā na paia ma mamalu le tauaofiaga a le Faasinoti Ekalesia Metotisi i le taeao segisegi o le Aso Toonai, aso 8 o Iuni.
O se faatasiga na iai le Aao taitai o le Atua. Na amataina i se sauniga lotu sa faauuina ai tofi o failauga faamaoni o le talalelei, ma faagasolo ai le fono a le Sinoti a Kuiniselani auā tapenaga mo le Koneferenisi tele e usuia i Samoa ua lē o toe mamao.
E toalima failauga faamaoni sa faauuina i lea taeao e aofia ai le susuga ia Ioramo Letoa ma Tafā‘ese Saolotoga Vialau (Morton Bay); afioga ia Maualaivao Tusitala Timoteo (Logan City) faapea le afioga ia Faumuina Sione ma Sale Tupu o le matagaluega a Browns Plains.
E ono mataupu na pasi a i latou nei, lea na molimauina e le loaloa o le Faasinoti lo latou laufofoga fiafia a o tauaaoina tusipasi faamaonia. E moni lava ana lē seanoa Ieova e lē mafai ona tau lau o faamoemoega.
Na mae‘a le faauuga, sosoo le Sinoti a faifeau ona amataina ai lea o le Sinoti tele. Na auai le afioga i le Sea ia Rev So‘afā ma le tina o le auso fealofani, le faletua ia Logotaeao Mulipola faapea tausi matagaluega uma ma faletua aemaise le paia lasilasi o le Faasinoti.
Sa fili ‘afa le tofā ma le faautautaga faakerisiano auā se tasi, ma ua mae‘a ma tuufaatasia nei mo le Koneferenisi tele lea e usuia i Samoa pe a tusa ai ma le finagalo o le Atua e aulia atu i le soifua maua ma le lagi e mamā.
