E toafā ituaiga tagata na fai e le Atua

O le mau lea a le alii Palemia i lana lauga e tatala aloaia ai le tausala a Faafine na alu le vaiaso na tea nei o fai i ai faamatalaga a nisi o le atunuu i luga o leitio.
O le faaseā a nisi e pei ua leai se popole o le alii Palemia i ana lafoga ua fai ai lea faamatalaga. Faaali e se taulealea na sao atu sona finagalo i le polokalame o le Ualesi Mosooi, e lē o ni mataupu nei e tatau ona faamamasania ai le tofi Palemia o le atunuu ma e tatau lava ona fai fuafua lafoga.
O le saunoaga a le alii Palemia na ia ta‘ua ai e lē toalua ni ituaiga tagata na fai e le Atua, e fā, o alii ma tamaitai ma faafāfine faapea le ituaiga lona fā o faafatama. “O lea la ou te faatali pe o afea e oo atu ai se asosi o faafatama”.
“O le fenumiai o sela tama ma sela teine ua mafua ai le iai o manatu o nisi o tama o i latou lava o tamaitai ma e faapena foi i nisi o tamaitai.”
Ae na faaalia e le alii Palemia o faafāfine uma lava o le Asosi a Faafafine lea e faatamā ai, e palota uma lava ma faamaopoopo i meafai a le Vaega faaupufai o le HRPP e puipuia aiā tatau a tagata.
O isi valaau na ta‘ua e se isi alii i totonu o le taulaga o Apia, e ala ona lagolago ma faatamā le alii Palemia i le Asosi Faafāfine ona o ia le isi faafāfine.
O lea ua aveese i le tulafono sa iai i Samoa le faasalaga lea sa faia i faafāfine e tapu ai le ofu i laei tamaitai faapea foi i tamaitai.
O se tasi lea o laasaga tele na ta‘ua e le Asosi a Faafāfine ua mautinoa ai le amanaia e le Malo o a latou aiā tatau faaletagata. E lē gata i lea ua tele ina aofia lenei faalapotopotoga i galuega faalauiloa a le Matagaluega o le Soifua Maloloina ona o le unai o a‘oa‘oga o le faama‘i o le HIV/AIDS aemaise isi galuega o le soifua maloloina e pei o faamalositino.
Na faapea foi ona faaalia e le Alii Palemia o le toatele lava o faafāfine ua iloga le tulai mai i galuega ua faatino i totonu o le Malo i ona Matagaluega ma Faalapotopotoga aemaise foi pisinisi tuma‘oti.
O le faaseā a le toatele e pei ua tausolomua i le taitai le unai o finagalo o loo tetee ai le toatele ae o le faafetai a faafāfine, o le amanaia o i latou o isi tagata soifua. Ae e lē o iai ma se faamatalaga a nisi ua ta‘u e le alii Palemia o ni faafatama.
O le tupe na maua i le tauvaga o le a agai i nofoaga e pei o le Mapuifagalele, Loto Taumafai ma isi faalapotopotoga e moomia le fesoasoani.