E $250,000 le tau aofai o se faletele a le afioaga o Faleula lea na tatala aloaia i le faaiuga o le vaiaso. O lenei galuega sa tagi lava i lima o le afioaga lea ua mafai ona tino mai.
O le faafaileleina o fanau o le matafaioi a le nuu, o se fuaitau na faaautu ai le tatalaga o le faletele a le aoga tulagalua a le afioaga o Faleula lea ua faaigoaina o Lapalapa o Malo.
O lenei galuega ua faia faapitoa mo le fanau aoga auā soo se meafai a le aoga. O le Palemia Susuga Tuilaepa Sailele Malielegaoi na saunoa i le saunoaga autu o lea faamoemoe ma na ia ave le faamalo i le afioaga e ala i lea atinae ua mafai ona faatinoina.
Ta‘ua e le alii Palemia o le tele o afioaga e faatali lava seia oo atu se fesoasoani mai i fafo ona faatoa faagasolo lea o galuega tetele faapenei, ae o le faafetai ona o lea ua mafai lava e Faleula ona faatino lenei galuega e ala i mātua ma sui o le nuu.
Faaalia e le taitai o le galuega le afioga Simanu Afoa Titi, o le tele lava o le galuega na tagi lava i lima lona faatautaiga ma na ao mai seleni e ala i tausala faapea ai ma lulu a le aoga. O le tupe na mafai ona aoina e $250,000 lea na faatino atoa ai lava le maota lenei ma totogi ai le au kamuta.
O le tamaitai amepasa o le malo o Saina na faapea ona ooti le lipine mo lenei faamoemoe ma o iina na saunoa ai loa Li Yanduan o le a faatino se fesoasoani mo le afioaga, ma e iai le fuafuaga a le komiti o le aoga poo le ā le aofai o le a faimeaalofa ai le malo o Saina o le a fesoasoani lea mo nisi o fuafuaga a le afioaga.
O le tausaga na tea nei na talosagaina ai le malo o Saina mo lea fesoasoani ae o lea ua mae‘a le galuega ae ua ofo mai nei le fesoasoani a lea atunuu.
O le faamatalaga a le tamaitai amepasa e tāua tele le atinae o aoaoga i totonu o Saina ma o se tulaga e faamalosia ai foi le lagolagoina o taumafaiga a le Malo o Samoa i le unaiga o aoaoga ma e ui o lea ua tuai ona tali mai lona malo ae e mautinoa o lea o le a faatino ma aumai le fesoasoani mo Faleula auā e tele isi auala o loo moomia ai le fesoasoani i le faaleleia o le aoga.
Na saunoa le toetaufanua ia Loau Keneti Sio e faafetaia le lagolago mai o nisi o paaga a le afioaga mo le faatinoina o le galuega.
O le aoga tulagalua lenei i Faleula e silia ma le to‘a 300 tamaiti aoga o loo aotauina ai ma o lenei faletele o le a lē gata ina faaaogā e le aoga ae faapea foi meafai a le afioaga.
