Ua pasia le teuteuga o le Tulafono o Faigapalota ma ua faatumau ai pea le vaevaega o le itumalo o Safata, o Alataua le isi itumalo ae o Sa Tunumafono le isi itumalo. Ua lē talia ai e le Malo le talosaga na momoli atu e se sāvali o alii ma faipule o Safata i ona paia ma mamalu faalupelupeina.
O le lē logosaia o se faatalauula a le itumalo ua liliu ai nei nisi na auai i le sāvali e tuuina atu se tagi i le faamasinoga maualuga e soloia ai le teuteuga ua pasia e le Palemene, ona e lē talafeagai ma le faataotoga o upufai o Safata i tulaga faaleaganuu.
A o tapena ai lea fuafuaga ua aumai se finagalo o le tasi o faipule o Safata le afioga Palusalue Faapo II, ma ia talosagaina ai le itumalo e talia loa le faaiuga ua pasia. I se feiloaiga ma le faipule i lona ofisa, na ia faaalia ai, e mafua sona finagalo i le taimi nei, ona e tatau ona usitaia ma faaaloalo tagata uma i faaiuga a le Palemene.
Peitai e lei tele se finagalo o Palusalue ina ua fesiligia i le ave o le faaiuga ua iai nei a le Palemene faasino i le vaevaega o lona itumalo i le faamasinoga. E lē o iai sona lagona e faatino sea tulaga i le taimi nei, ae afai o se finagalo lea e ono taunuu i ai le paia o le itumalo, o le pitolaau lava lea a le itumalo e lē oo i ai sona malosi.
Ua oo mai ni molimau ua ta‘ua ai le tapena o se tagi e faaulu i le faamasinoga, ma e lei manuia sailiga mo se finagalo o nisi o tamalii sa taulamua i le sāvali na momoli ai le talosaga i le fono aoao faitulafono.
O le folafola e le Palemia o se faamata‘u i sui o le latou vaega faaupufai, o le aulape e tuli ese ai ma le HRPP pe a palota ese se tasi mai le lagolagoina o le teuteuga, ua faaalia e le taitai o le Itu Agai e lē o se faiga temokarasi amiotonu lea. Fai mai Palusalue sa tatau i le Palemia ona ave le saolotoga i sui o lana vaega e faia ai le latou filifiliga saoloto i le tetee ma le lagolago i le teuteuga ua aofia ai ma le vaevaega o Safata i ona itumalo fou e lua.
Peitai o le finagalo o le Palemia le taitai o le HRPP le susuga Tuilaepa L Sailele Malielegaoi, o faiga ia faatemokarasi tau vaega faaupufai poo le Westminister Style. O le finagalo o le Palemia e iai lava mataupu e ave ai le faitalia ma le aiā tatau faapea le saolotoga i le faipule o le pati e faia ai lana faaiuga i se mea o le a faatulai atu e le Malo.
O sui o le HRPP i le komiti faapalemene na fautuaina le taofi o teuteuga o le tulafono o faigaplota e faatino i le palota tele o le tausaga fou, na lagolgo i le tulafono ona o le fefefe i tutuli ma le vaega faaupufai pe a palota tetee.
