O faasalalauga tau televise faaonapo nei ua faaaogā ai fesootaiga televavave tau internet e ta‘ua o le Internet Protocol Television (IPCTV) o le fesootaiga lata mai lea tau televise ua faaulufale nei i Samoa e ala i le tautua a le kamupani telefoni o le Bluesky Samoa, e ala i le Moana TV o le a faaoo atu ai i laoa ma maota le tautua faatelevise e luasefulu ma ona tupu alaata poo channels.
E lē gata o Samoa Tutoatasi ua muamua oo mai i ai lea ituaiga o tautua tau televise e faaaogā ai le internet ae o le taimi muamua foi lea ua oo mai ai i le vasa Pasefika i Saute.
Ua ave ai le faamalo ma le faafetai a le alii Palemia, susuga Tuilaepa Lupesoliai Sailele Malielegaoi, i le pulega o le Bluesky, i le alii pule sili le afioga Aoe‘e Adolfo Montenegro ma le pulega atoa, ona o le maualuga o se isi matatia ua ausia i lana tautua ma le auaunaga.
O le faafetai a le taitai o le Malo na molimoli ina ua faalauiloa lenei tautua fou i le afiafi o le Aso Faraile na tea nei, 2 o Novema 2012.
Faaalia e le pule sili, e limasefulu nofoaga eseese o le atunuu o le a oo i ai le Moana TV ae o le a faaola auauai i ni laasaga o le a faia auauai.
O le taimi amata o lea tautua tau televise, o le a muamua ola le talafatai o le taulaga o Apia agai atu i Laulii ma le alu atu i Apia agai i Puipaa ma le agai i Siumu.
O Savaii o le a oo foi i ai i se taimi, ae e faalagolago lava lea i le faatinoga o le galuega e faasolosolo atu ai le faaooina o lea auaunaga tau fesootaiga seia soo atoa le atunuu.
Saunoa le alii Palemia o se faaiuga tonu na faia e le malo e faatau atu i le Bluesky le SamoaTel e pei ona molimauina le vave oo mai o nisi suiga fou e lelei mo lana tautua i Samoa Tutoatasi auā o le kamupani lenei e faagaioia foi i Amerika Samoa.
E lei faailoaina mai e le pulega o le Bluesky poo ā tonu polokalame o le a faasalalau e alaata e lua sefulu ma ona tupu a le Moana TV, ae o loo iai le talitonuga o polokalame e pei o taaloga eseese i le lalolagi, o ata mo fanau iti, o ata o tala fou mai vaega eseese o le lalolagi, aemaise o ata faaleaoaoga o talaaga o tagata, ma meaola o le siosiomiaga faapea isi polokalame e talafeagai ma le maimoaga a tagata i Samoa.
O le faalauiloaina la o lenei tautua i le faaiuga o lena vaiaso ua mavae, ua talafeagai foi ma le faaiuga o lenei tausaga o le a toatele aiga ma fanau ma malo eseese mai fafo o le a afea Samoa mo tafaoga ma malologa o le Kerisimasi ma le Tausaga fou.
Ua faailoaina mai e faapea o le a totogi le $80 pe a moomia le tautua a le Moana TV e pei o televise e totogi alaata e pei o le Sky ma le CableTV, e pei ona sa faailoa muamua e le pulega o le Bluesky e iai se taimi ona liliu lea o le tautua a le Moana TV i se tautua faapisinisi poo le Commercial TV.
