Maliu se tasi o faiaoga iloga o Samoa – May Saaga

O le Aso Lulu o le vaiaso lenei e faamavae atu ai le atunuu i se tasi o auauna faiaoga ua tele tausaga o tautua e lē gata i Samoa nei ae faapea foi i Amerika Samoa.

O le Afioga Fuatino May Saaga e maliu ua 76 tausaga o lona soifua.

O lana tautua faafaiaoga na matuā toatele alo o le atunuu na faapea ona faamanuiaina ai. Na amata faato‘ā 17 tausaga o lona soifua ma na aoaoina ai i le aoga faafaiaoga a le atunuu i Malifa. O le tausaga foi lea na faaee ai i lea tamaitai le suafa Fuatino a lona aiga i Satapuala (Toesulusulu Si‘ueva).

Na mae‘a le tolu tausaga i le aoga faafaiaoga ma agai i le Kolisi o Samoa ma faiaoga ai seia oo ina toe alu ese mai ma faigaluega i le alaleo faasalalau mo aoga a tamaiti i luga o le 2AP (School’s Broadcast).

O nisi o aoga sa faiaoga ai Fuatino, e aofia ai le aoga a Leifiifi, Leififi Intermediate, Aoga Faaitumalo a Aana, Faleata, ma Vaigaga.

O le 1963 i le 1966, sa malaga ai o ia i Amerika Samoa, ma galue ai i aoga a Utulei ma Faga‘alu ae na toe taliu mai ma toe galue i Leifiifi Intermediate, mulimuli ane tofia e avea ma puleaoga o le aoga laiti a Afega.

Sa toe tofia Fuatino e le Matagaluega o Aoga i le tofiga asiasiaoga, ma galue ai loa i le Itumalo a Anoamaa, faasolo ai i Vaimauga ma faaiu ai loa lana tautua ina ua malolo litaea a o asiasiaoga i Sagaga.

E lei gata iinā le auaunaga a lea tina, sa ia faatū le Kolisi o le Faatuatua i Vaitele ma faaauau ai lana tautua i le a‘oa‘oina o le fanau.

O se tasi lea o sui o le aiga faiaoga i totonu o le atunuu o loo iai le taleni mo tusitusiga ma ua mae‘a ona ia tuufaatasi ni tusi mo tamaiti, e aofia ai tusi fagogo ma tala i tina o le Tusi Paia.

E maliu lea tina o tuufaatasi se isi ana tusi faitau mo fanau aoga lava. Sa iai se lipoti i le vaiaso o faiaoga na tapa ai lea tina ma na faaalia ai e Fuatino, e leai ni faafitauli o le galuega faafaiaoga pe a lava tapena le faiaoga mo lana galuega i aso taitasi.

Na ia ta‘ua foi, pau le suiga ua ia vaaia i lenei vaitau i le faatinoga o le galuega faafaiaoga, o le lē tuu atoa o le faamoemoe i le avea ma faiaoga.

E valaauina lea auauna o galue lava ma na see ese mai ana galuega faafaiaoga ae amata ona  galue i le Faalapotopotoga o le Komiti Tumamā o tina ma tamaitai Samoa i le a‘oa‘oina o le suisui faatasi ai ma le faiga o le elei faapea le siapo.

O se tamaitai e naunau tele i le faaleleia o le gagana Samoa atoa ai le gagana Peretania ma o lona sao o se tasi ua lomia ma tuufaatasia ni ana lomiga ma lipine o tala ma fagogo a Samoa o nisi ia o auala sa mafai ona faamautu ai lona sao i le faaleleia atili o le itu tau i aoaoga i fanau uma o le atunuu.