O le lima tausaga talu ai na vaaia ai le faaopoopo o atinae Samoa i Sini e auala i faleoloa o ituaiga eseese.
O lenei suiga ua aogā mo tagata lautele o faatau i oloa Samoa ma le Pasefika auā ua iai se tauvaga mo oloa taugofie i lea faleoloa ma lea faleoloa. O lea foi la ua faaopoopo nei i ai se faleoloa o laei ma teuga Polenisia i le sefulutasi o faleoloa Samoa o loo iai i Sini.
O lea faleoloa ua ta‘ua o Le Polynesian Styles, ma o loo iai i le pitonuu o Campbelltown. O le Alii Pule ia Talaoalii Fuamatu mai Fagalii ma lona faletua ia Imeleta mai Laulii ma Lalovaea o loo faatautaia, ma ua atoa i ai faleoloa Samoa i Sini.
Na tatala aloaia e le susuga i le Patele ia Spa Silva lea pisinisi ma ooti ai loa le lipine. Na vaaia le auai atu o aiga ma uo aemaise nisi o le aufaipisinisi auā le molimauina o laei ma teuga faasamoa ua taunuu mai.
“O le matou auaunaga e su‘i lava iinei laei auā e faigata le faalagolago i le auina mamao mai Samoa. O le maua foi o ie, filo ma tagata agavaa suisui i Sini nei o se mafuaaga tonu lea na fuafua i ai lea faamoemoe,” o se saunoaga lea a le tamaitai Pule ia Imeleta Talaoalii.
O le ulufale atu o le faleoloa lenei ‘Le Polynesian Styles’ e avea ma lona sefululua (12) o taumafaiga a tamalii Samoa i Ausetalia nei. O le tele o isi tagatānuu mai Asia, Initia Fiti ma Arapi o loo faatautaia isi pisinisi o loo faaaogāina foi e tagata Samoa ma le Pasefika, ae peitai o le faaopoopo pea o tagata faipisinisi Samoa e atagia ai le tausinio ma fuafua lelei a latou atinae.
O le tulaga masani, o Samoa lava e tu mo Samoa i taimi o sailiga seleni auā atinae o Ekalesia, afioaga i Samoa ma taumafaiga i Sini nei.
O nai pisinisi Samoa foi e taunuu muamua i ai tusi lulu ma Battons Up auā se fesoasoani ma tali atu i le faatalauula atu o Samoa auā ua fai ma agaga le fai atu i le Saina i Sini nei, Arapi ma Initia i nei tusi lulu ma Battons Up ae pepelo mai se‘i sau le Pule ae o le mea moni o ia lava o le pule, ae musu e ave sana foai i tatou tagata o loo ola ai a latou pisinisi.
