O le valaaulia mai le Malo o Isaraelu e asiasi atu i se malaga taualoa le Palemia o Samoa tutoatasi le susuga Tuilaepa Lupesoliai Sailele Malielegaoi, ua faailoa mai e se molimau faatuatuaina o le a taunuu lava lea malaga taualoa i le lua vaiaso o lumanai nei.
O le a malaga muamua le taitai o le Malo i sona valaaulia i le faamanatuina o le iupeli auro poo le 50 tausaga ua atoa talu ona faatū le ekalesia Penetekoso o le atoatoa o le tala lelei i Amerika Samoa i le Aso Sa 11 o Novema 2012, ona faato‘ā tuua ai lea o le atunuu i le aso 25 o Novema 2012 mo Isaraelu.
O lea malaga taualoa e pei ona faailoa e le molimau faatuatuaina o le a afea ai foi nisi o atunuu Europa e pei o Siamani. Peitai o le autū o le faigamalaga o le tali valaau i le Malo o Isaraelu e pei ona avea lona Amepasa mo Samoa ma sui o lea malo.
Na ia faailoa lea valaaulia i se tali faaaloalo a le Amepasa o Shewi Tzur i le masina o Me o le tausaga nei ina ua malaga mai i Samoa mai lona ofisa autū o loo i Niu Sila e tauaao se meaalofa a lona Malo mo le faalapotopotoga o le taaloga soka i lo tatou atunuu ma ni vailaau mo togafitiga faafomai mo le matagaluega o le soifua maloloina.
O le malaga foi lea a le alii Amepasa sa faailoga ai i Samoa ma le atoaga o le 64 tausaga o le Malo tutoatasi o Isaraelu, lea sa auai ma le alii Palemia i se fiafia na faia i le faletalimalo o Aggie Greys i Vaisigano i Apia.
Na faailoa ai lava e le Palemia o Samoa i lea faatasiga lona talia o le valaaulia mo sana asiasiga taualoa poo se State Visit. Faaalia e le Amepasa o Isaraelu mo Samoa le galulue faatasi o lo latou malo ma le malo o Samoa i atinae tau faatoaga, soifua maloloina, malosiaga, aoaoga ma taaloga.
E lei faailoaina mai le polokalame o le malaga taualoa a le Palemia o le tatou atunuu i Isaraelu ae poo ai foi o le a aofia i lana aumalaga.
O le Palemia muamua lea o le Malo o Samoa ua valaau faaaloalo mai i ai se taitai o lea Malo e malaga atu mo sana asiasiga taualoa. O se matati‘a foi lea i le nofoaiga a le faipule o Lepa i le Palemene, ma e lē gata o ia le Palemia pito umi i lea tofiga maualuga o le malo ma le atunuu, ae o lea foi o le a faamauina o le uluai taitai o le tatou malo o le a faia se asiasiga taualoa i le nuu paia o Isaraelu, e pei ona talitonu iai le aukerisiano uma o le lalolagi. E lē taumate o le a lē misia i se polokalame o lea malaga taualoa se asiasiga i nofoaga paia sa feafioa‘i ai le Alii Faaola o Iesu ma faia ai ana lauga ma vavega ma isi lava galuega mamana a o soifua o ia i le lalolagi nei i le silia i le lua afe tausaga talu ai.
