Faatupe lana pisinisi i tupe na tuu i ai e fai ai visa o tagata o lona aiga

Ua feololo lava le numera o mataupu e oo i le faamasinoga e mafua mai i faiga visa ma pepa malaga mo tagata e fia faigaluega faavaitaimi i Ausetalia.
E pei o le tamaitai o Lealofi Schuster Esera o Vailele na ia fesootai i tagata o le aiga o lona tina i Manunu ia Setema o le tausaga ua mavae ma fai i ai o loo saili nisi e faigaluega faavaitaimi i le tauina o le ‘apu i Ausetalia.
Na ia faailoa i ai ma le totogi o le faiga o pepa ma visa lea e faapea e fitu selau tala mo le tagata e toatasi. O nisi e toalima o le latou aiga na ave seleni i le tamaitai ona o nai a latou fanau e fia maua ia galuega.
Na faailoa i ai e le tamaitai o Tesema e tatau ona malaga ese ai ma Samoa. Peitai na uma lea masina e leai se malaga, ona toe o lea ma lona toalua ua faailoa i tagata ua lē oo, ae o le masina o Me o le tausaga nei e faatoa faataunuu ai le faigamalaga.
E tusa ai ma faamaumauga a leoleo na folasia i luma o le faamasinoga, e lei taunuu foi le malaga ae na maua e tagata se faasalalauga i luga o le leitio ua faailoa atu ai, e malilie ua lē taunuu le malaga ona ua leiloloa uma tusifolau sa i le ato a lē ua molia e faapea sa i totonu o se taavale.
Na logotala tagata i le faasalalauga ma latou sailia loa le leitio na faasalalauina. Peitai na faaalia e leoleo na maua ane e lē sa‘o le faasalalauga ma savalia ai loa le ofisa o leoleo mo se fesoasoani.
Na faamatala Lealofi i luma o le faamasinoga o le ofisa o leoleo na saini lima ai tagata na ia faaaogāina a latou seleni ina ua ia toe totogi i ai a latou seleni.
Ae o lana faamatalaga sa ia faaaogā tupe a nei tagata e tusa lo latou aofaiga ma le lua afe ma ona tupu e faatau ai taga sima o le la pisinisi o loo gaosia ai le piliki, ma le faamoemoe e maua tupe o le la pisinisi ona toe faaola ai lea pe toe totogi ai. Peitai o le saunoaga a le faamasino le afioga Vaepule Vaemoa Vaai, e lei avea tupe a tagata i le tamaitai e faatau ai ni taga sima o lana faiga piliki ma lona toalua.
Ua faamaonia ona moliaga e lima o le gaoi ma nofo vaavaaia mo le lua tausaga ma le tuutuuga e lē tatau ona ia toe solia ai se tulafono auā e leai se avanoa mo ia pe a toe aafia ise moliaga ma tulai ai i le faamasinoga.
Ua faatonuina foi na te totogi le tolu selau tala o le totogi o le faamasinoga, ma ia uma le Aso Tofi na tea nei ua totogi, a leai ua lua ona vaiaso i Tafaigata.
O loo iai isi ona moliaga ile mataupu lava i tupe o visa ma o loo ia teena. O le a suesueina ia moliaga ise aso e faatulaga e le faamasinoga.