Tuai i totonu Manu Tuilagi i le lami

E ui na tuai ona sui atu i totonu Manu Tuilagi i le suipi a le Liona i ‘ai 41-16 i Sini nei, ae na lagona pea le fiafia o le tapuaiga a Samoa i Ausetalia nei e lagolagoina lenei alo iloga. Na mata‘i uma i latou o aiga ma uo e lē gata i Sini ma le lalolagi atoa i le taimi e alu ai Manu i totonu mo lana taaloga faitaulia (test) mo lenei aufili a Peretania.
I se taaloga na gugulu ai Peretania tele ma Aialani a o lei faataunuuina talu suiga tetele na faia e le faiaoga ia Warren Gatland.
O se tasi o lenei suiga e aofia ai le pikiina o le centre tautaua ia Brian O’Driscoll mai Aialani ae maua ai ma le avanoa o Manu Tuilagi i le nofoa o le aufaaleoleo. Sa lavea Manu Tuilagi i le taaloga a le Liona ma Melepone i le tolu vaiaso talu ai faatoa toe malosi mai ai i le taaloga faaiu.
Na fia maimoa foi Ausetalia i le momo‘e malosi a Manu mai le amataga aepeitai na mataina le osofai i le minute amata lea na mafua mai i se sasi o le feeseeseaiga a le ‘afa a Ausetalia ia Will Genia ma lana foueki maua ai se sikalamu na osofai atu ai lava le Liona ma sikoa ai le latou pou ia Alex Corbisiero mo ‘ai e 7-0 faatoa minute talu ona amata le taaloga e saili ai le siamupini.
E lei mafai lava ona toe faatali le Liona ma e ta le ‘afa o sili e 19-13 e ui na toe sikoa le numera sefulu a Ausetalia ia James O’Connor ta ma le ‘afa. Sa faapea e sui atu Manu Tuilagi i le ‘afa auā sa vaaia le tau malosi o le osofai a le Wallabies i le amataga o le ‘afa mulimuli e ui na faasala mo le 10 minute la latou pou o Ben Alexander.
Na toe ova se sala a Chris Lealiifano ma latalata ai ‘ai o le taaloga i le 19-16 ae pagā lea na toe sosoo sikoa a le Liona mai ia George North, Jamie Roberts ma Jonathan Sexton mo ‘ai e 41-16. I le toe sefulu minute na iai Tuilagi i luga o le malae na matuā mausalī le manumalo a le Liona mo le tauvaga taamilo e sefulu taaloga.
E sefuluono (16) tausaga faatoa toe manumalo lea faapea ma o le amataga foi lea o se feagaiga i va o tamafanau Samoa ma le Pasefika ma le Liona i le uluai filifilia o Toby Faletau, Mako Vunipola (Toga) aemaise Manu Tuilagi (Samoa) ma Sean Maitland (Maori/Samoa).
Ua molimauina nei e le to‘a 84,000 na maimoaina lenei taaloga i se po malulu tele i Sini nei le ono sainia i le lumanai o tama Samoa ma le Pasefika e kalapu mai Peretania ma filifili ai loa i le Liona.
O se ‘au malosi aemaise o le maoae o seleni e totogi ai tama taaalo.