“Aiaia foi le aveesea o se suafa matai pe a solia le mamalu o se matai”
E lē o toe mamao ae amata faamamalu faaletulafono le tatau i se tagata Samoa o le a faaee i ai se suafa matai ona aulia le 25 tausaga o le soifua.
O le autū lea o ni teuteuga o Tulafono o Fanua ma Suafa ua mae‘a ona soalaupule e le Palemene i lana tauaofiaga i le vaiaso ua mavae, lea ua faasee atu ai le teuteuga i se komiti faapalemene mo le iloiloina ina ua pasia le faitauga lona lua. O agavaa ua aiaia i le teuteuga ua faaalia ai, “e lē agavaa se tagata e umia se suafa matai poo ia faamauina e avea o se matai seia vaganā ai a itiiti mai e 25 tausaga le matua ma ua sauni e tauaveina matafaioi o lona suafa matai e aofia ai le tautua lelei i lona aiga, nuu ma afioaga e tusa ai ma aganuu ma agaifanua a Samoa”.
E ui ina iai lea aiaiga fou, peitai e mafai e le Faamasinoga i tulaga faapitoa e alia‘e mai ina ia tusa ai ma aganuu ma agaifanua a Samoa i luga o se talosaga a se Sa‘o poo se suli, ona faatagaina se tagata e lei atoa le 25 tausaga ona umia se suafa matai. Peitai a itiiti mai e 21 tausaga le matua, ina ia maua le matua e agavaa ai e avea ma sē e umia le suafa matai. O teuteuga fou foi ia ua iai ma le malosiaga faaletulafono e aveesea ai se suafa matai.
O loo faapea mai le faafuaiupu e 20B, “E mafai e le Faamasinoga i luga o se talosaga a se Sa‘o poo se Suli ona aveesea se suafa matai pe afai o lē o umia lea suafa:
• Sa ia faia se amioga e tauvalea ai le aiga, nuu poo le afioaga o matai poo:
• Ua lē mafai ona faatino lelei i se isi faiga e ese ai ia tiute tauave o se matai poo:
• Ua faamaonia le nofosala i se solitulafono matuiā lea e ono faasalaina ai i le nofosala i le falepuipui mo le olaga atoa.
O se tasi o vaega tāua ua aiaia faaletulafono i lalo o ia teuteuga fou, o le faatinoga lea o se faaleleiga faa-Samoa e auai uma itu o se mataupu a o lei suesueina i luma o le faamasinoga. Ua iai foi malosiaga ua tuuina atu i lalo o lea teuteuga i le Resitara o Faamasinoga, na te teena ai le tuuina atu o se mataupu i le faamasinoga, pe afai e lei auai uma itu o se mataupu i se faaleleiga faa-Samoa ua aiaia faaletulafono.
O le vaega 34D o ia teuteuga o loo faaalia ai e faapea: “Afai ua manatu le faamasinoga e mafai ona fesoasoani faagasologa o faaiuga e foia ai se feeseeseaiga i vaega auai i se feeseeseaiga ua i ona luma ina ia foia ai lea feeseeseaiga, e mafai e le faamasinoga ona fautuaina vaega auai ina ia faaaogā lea faagasologa o faaiuga e foia ai se feeseeseaiga”. O loo faapea mai foi le puipui 6 o lea teuteuga, “E mafai e le Resitara ona taofia le faatulagaina i lalo o se mataupu mo le fofogaina seia vaganā ai ua faatino e vaega auai i lea mataupu se faaleleiga faa-Samoa po ua fuafua le faaleleiga i se isi faiga e ese ai, ina ia tusa ai ma aganuu ma agaifanua a Samoa”.
