Pulega EFKS Saute i Kuiniselani
E ui ina fai i lagi le tuligasia a tuaa ua mavae, ma ua lagomau mai i tiasa lo latou soifua, i lo latou asā o le gasū i le taeao e ala i le talaiina o le talalelei a le Atua, a o lenei ua faatupulaia a latou galuega, e ala i le tupu mafalā o le Talalelei a Keriso e pei ona o latou tuutaliga mai i tupulaga o nei ona po.
E faapena se lagona sa tupu a‘e i le Aso Toonai, aso 11 Fepuari 2012, sa faatuina aloaia ai se tasi o Ekalesia fou o le EFKS i totonu o le pulega i Saute, i lalo o le taitaiga a le susuga ia Tauaaga Mataafa. E moni ai upu o le Tusi, o le faamoemoe ua taunuu o le laau lea o le soifua.
O le igoa o le Ekalesia, E.F.K.S. “LO‘U OLA IA AOGĀ”. O le taitai o le Ekalesia, o le susuga i le faifeau o Faafetai ma lona faletua o Mary Setefano.
Ua atoa nei le 11 o aulotu o le pulega i Saute, ae ua faapena foi ona suia ai ma le fuainumera o aulotu o le Matagaluega Kuiniselani EFKS mai le 22 i le 24 aulotu ua iai nei.
Tatou te faafetaia ai pea le Atua, auā o i tatou na o le totō ma faasūsū, ae o le Atua na te faatupuina.
O le nofoaga sa faataunuuina ai le faatuina o le Ekalesia, o le 13 Logandowns Drive Meadowbrook.
Na taitaia le sauniga e le susuga i le toeaina Tauaaga Mataafa (toeaina o le pulega i Saute).
O le faitauina o le Tusi Paia, o le susuga i le faafeagai ia Rev. Safiti Iupati (faafeagaiga o le ekalesia Sulu o le Talalelei). Na tuuina le avanoa i le Failautusi o Lupesoliai Molia, mo se tala o le lotu.
E na o le tolu aiga o loo amata ai le faatuina o le lotu, ae toafā i le faifeau ma lona faletua.
O le tala e faapea, sa finagalo le faifeau ia faatu se lotu, ona faapea lea ona alu le savali i aiga e lē o mafai ona auai i sauniga, ina ia ave le soifua mo le Atua, e ala i le faatuina o se ekalesia.
Ma o le lagona la lena sa mafua ai ona manatu nei aiga, o le a faatu le ekalesia ae faamoemoe lava i le malosi mai le Atua. Lea la ua iai lenei aso.
O talosaga sa molia e le susuga i le faafeagaiga ia Rev. Parataiso Afaaso (faafeagaiga o le ekalesia Loganholme).
O le faafeagaiga o le ekalesia Logan East, le susuga ia Rev. Isamaeli Liaina, o ia lea sa ia tomatauina ma faamalosi i le ekalesia fou e ala i le upu folafola a le Atua.
O le manatu sa faamamafaina e le failauga e faapea: “E Filifilia ma Faaaogāina e le Atua lo tatou Faatauvaa”. Sa faaautuina le lauga, poo le ā le ituaiga tagata e iai o tatou tagata, e pule lava le Atua i lona filifiliina o i tatou. Aua o ia lava e pule mai, ma totofi mai lo tatou ola ma le soifua i lana feau ma lana galuega. Auā o o tatou manatu e lē o le finagalo lea o le Atua.
Sa toe sautualua ma faalautele i se saunoaga faamalosi a le susuga i le toeaina faatonu o le Matagaluega EFKS Kuiniselani, le susuga ia Kerita Reupena. Sa faamamafa foi i se saunoaga a le Tamā Toeaina ia Reupena, le tagata e galue ma le faamaoni e faatusaina i le saito e pa‘ū i le eleele lelei.
Na maua foi se sao o le Taitai o le Sauniga, susuga ia Tauaaga Mataafa e saunoa faamalosi ai i le Ekalesia fou.
O le susuga i le Aao Tusitusi o le Pulega (Rev Petaia Tuifao) sa fofogaina nisi o folafolaga, auā le nofo silafia e le ekalesia fou, o mea o le a faatupulaia ai lo latou faatuatua, e ala i galuegafai a le pulega, ua uma ona faataoto auā le savaliga i feau ma galuega o lenei foi tausaga.
Na momoli le agaga faafetai ole Susuga ia Lupesoli‘ai Molia i le taitai o le Sauniga aemaise ai lona auvaa filifilia, o i latou ua aumaia le upu faalaeiau mo le galuega tau amata a le Ekalesia, ona tapena lea e le ekalesia se faamalosi tino e ala i le taumafataga ina ua mae‘a le sauniga lotu.
Sa lagona le faafetai, ona sa auai uma Toeaiina o Tamā o le Matagaluega faapea le Tamā Malolo ia Samuelu Tuiai ma le faletua ia Tima, faapea le Tiakono Toeaina o le Matagaluega Su‘a Vasa Su‘a.
Aemaise ai le toatele o le aufaigaluega o le Matagaluega Kuiniselani, ma isi aufaigaluega mai isi fatafaitaulaga sa molimauina le matagofie o le faamoemoe.
Maualuluga foi faaaloaloga ma sa avea ai le Tofa ia Muaava Togia e fai ma fofoga o le Matagaluega a Kuiniselani ma Samoa ua potopoto, e momoli le agaga faafetai o le au toeaiina ma faafeagaiga ma Samoa ua potopoto, ona o le aao mafola e ala i ta‘igasua ma seleni paia ua faasopolia ai le mamalu o le aufaigaluega ma Samoa ua potopoto i le faamoemoe matagofie.
O le aofai o le seleni sa faimeaalofa ai ekalesia ma nisi o uso a malo, faapea Samoa ua potopoto i lea aso mo le Ekalesia fou, pe tusa ma le fa afe talā ma ona tupu ma sa momoli ai le agaga faafetai tele o le susuga ia Faafetai Setefano ma le faletua faapea le Ekalesia EFKS “LO‘U OLA IA AOGĀ”.
