E lē gata o le tele o matati‘a ua ausia e le alo o Samoa ia Sonny Bill Williams i le liki, iuni ma fusuaga faapolofesa, a o lea foi ua avea ma se tasi ua faatūina se matati‘a i le faatāuaina o lona faatuatuaga Isalama i lenei vaitau o le Ramadan.
O le vaitaimi lenei o le tausaga e faamanatuina ai le faatuatuaga anapogi ma talu ai o Sonny Bill o loo nafa ma le taamilosaga liki mo le Rossters, e lei avea lea ma alofaga e faatuatuanai ai ae na ia sapaia ma logoina lo latou pulega i le kalapu e fia faatāuaina e ia lenei vaitau.
O se tulaga faigata mo soo se tagata taalo auā e tatau lava ona tausi lona malosi e ala i le taumafa se vai i taimi o le aso ae lei pogisa aemaise i taimi o koleniga faapea taaloga. O lona uiga e lē mafai lava foi ona tagofia e Sonny Bill faguvai ia e pasi solo pe a momo‘e atu le tagata ma ia i luga o le malae.
E faatolu na koleni le Roosters i le aoauli ae faatoa inu lava Williams i le afiafi pe a goto le la talu mai le vaveao a o lei oso le la. Sa galulue foi le alii fomai o taumafa (dietician) lana au i le Roosters ia Keegan Smith mo le saunia o le tino ma taumafa mo Sonny Bill Williams e aofia ai falaoa faapitoa, silio, yoghurt ma fatu o laau‘aina, i‘a ma moa e aunoa ma mealololo, sisi ma le tele o le vaiinu a o lei oso le la faapea le taimi o le afiafi e pogisa ai.
O lenei naunautaiga o Williams o se laasaga faigata i lenei vaitau o taaloga polofesa ma ua matuā faalototeleina ma faamalosia ai lana ‘au o le Roosters.
O le faaiuga o le vaiaso na tea nei na manumalo mataina ai foi lana ‘au o le Roosters e 32-12 a le Panthers ma o toe minute na tipi ai e SBW le pasiga a Penrith ma momo‘e atu ai mo le tusa ma le 80 mita faatoa pasi ai le polo ma sikoa ai lana ‘au.
O le alo muamua lea o Samoa ua laasia lea tulaga auā le faatāuaina o lana talitonuga Mosalemi ma ua amanaia atili ai e tagata o lea faatuatuaga. O le taimi mulimuli na faia ai e se Samoa lenei ituaiga taulaga i totonu o taaloga o le Afioga Laauli Michael Jones lea e litaea lava e lei taalo i se Aso Sa i le faatāuaina lea o lona talitonuga faakerisiano e ‘Paia le Sapati’.
