Ua savali nei i le tolu tausaga talu ona faatu le faleaiga e ta‘ua o le Chen Trio i Taufusi ma o se faleaiga laitiiti e faafesagai lelei lava ma le maota o le Katoliko i lea vaega o le taulaga. O le faleaiga e faatautaia e ni alii mai i Saina ae ua faafaigaluega ai nisi i Samoa nei.
Talu ona faatuina lea faleaiga e tele ina gaosi ai taumafa Samoa ma taumafa Saina, e lei iai lava se faaletonu o lana auaunaga, ae o le vaiaso na tea nei na alu atu ai se alii avetaavale mai i Vaimoso mo sana taumafataga faapea ai ma se isi avetaavale la‘upasese.
O le avane o le taumafa na iloa atu ai e lea alii se lago o loo i totonu o le meaai. Na vave ona logo i latou o loo galulue i lea taimi ma faaali i ai le lago peitai na ta‘ua e lenei alii na ona asu ane lava o lana taumafataga fou ae e leai se tala e ta‘u atu ai pe aisea ua maua ai le lago i lana meaai, pe na mate le lago a o gasese le taumafa pe faato‘ā pe i le taimi na asu ane ai i le nofoaga lea e faailoa ai taumafataga a le faleaiga. Na fiu lava la lea alii e faatali se faamatalaga e tau ai lona loto, leotele loa i totonu o le faleaiga ma mafua ai loa ona ta‘ape nisi na aai ai i lea nofoaga.
Sa faapea ona ave e le alii lenei le taumafataga i le nofoaga o le Soifua Maloloina lea e iai tagata e vaaia auaunaga nei a faleaiga ma faapea ona fai i ai suesuega a le falemai. Na o latou faamaonia le oo atu o le avetaavale ma lana taumafataga o loo iai lava le lago.
Ona pau le faamatalaga na tuu mai e foliga mai na pe le lago i le taimi na gasese ai le taumafa ma o le Aso Faraile lava na faatonu ai le pulega o le Chen Trio e tapuni le faleaiga seia mae‘a suesuega a le Soifua Maloloina.
E lei manao le pulega o le faleaiga e tali mai i lenei faaiuga ma na o latou ta‘ua o le taimi muamua lenei ua tulai mai ai se faitioga faapea ae o le a faatalitali pea feutagaiga ma le soifua maloloina.
