E mae‘a le faiga palota ae masae le laufa‘i a alii ma faipule o le afioaga o Taelefaga ma lo latou sui o le Malo poo le pulenuu. O se faaiuga a le nuu e faatulai ese le alii pulenuu e suafa ia Tulima Lotoialii Sa Su‘a faatasi ai ma le isi tamalii o le afioga o Leuta Saifoloi.
Na iai nisi na faapea mai o le lē malilie lava o le nuu i le pulenuu ma lea tamalii i se lagolago na ave i se tasi o sui tauva ae e lei laga lenei mataupu ina ua oo le feeseeseaiga i luma o le Faamasinoga o Fanua ma Suafa.
O le tagi na sosoo ai ma le faateaga o le sui o le Malo na talosaga ai alii ma faipule o Taelefaga ina ia faamautu e le Faamasinoga i Mulinuu le latou faaiuga na fai.
O mafuaaga na tolaulau i luma o le Faamasinoga na aofia ai le fuaao e le toalua lea o le tele o feiloaiga a le nuu ma ni malo poo ni fonotaga tāua lava a le afioaga. O laua lava e tele ina lauga ma ave i ai faaaloaloga uma.
E lē gata i lea e iai se tupe ua faatolu nei ona avatu e le Malosiaga tau Eletise ina ia tau taofiofi ai le agai o Taelefaga e tapuni le afi o loo ola ai Fagaloa atoa, lea e faatu i totonu o le afioaga.
Tiga lava la ona tea ma le nuu le toalua lea, ae na maua lava a la seleni i le tufaga o le tupe a Taelefaga mai i le EPC ma o se tulaga na ta‘ua e sui o le afioaga na mafua ona mafai ona o laua lava nei o loo agai i ai le EPC.
Ua tuuaia foi nei matai o le nuu i le tala‘i o faamatalaga faapea o lea ua vaelua le nuu ma ua lua afioaga i totonu o Taelefaga.
O ni uiga na ta‘ua e le afioaga i luma o le Faamasinoga o Fanua ma Suafa, ua matuā lē amanaia ai e nei matai faaiugafai a le nuu ma tulai mai ai feeseeseaiga e ono vevesi ai le afioaga i le lumanai.
E ese foi le finagalo o le sui o le Malo latou aemaise le isi tamalii o le afioaga ia Leuta Saifoloi. Sa iai a la tetee na tuu atu i luma o le Faamasinoga peitai na faaleaogā uma e le Faamasinoga.
O le finagalo o le Faamasinoga o Fanua ma Suafa, e tatau ona toe foi itu e lua i Taelefaga, e talanoa ma saili se auala e toe faalelei ai le feeseeseaiga ua tulai mai.
E tele lava mau a itu e lua ae na manatu le Faamasinoga e tatau lava ona fofo alamea faafitauli o le nuu ae lē o le faatāsiga mai i le Faamasinoga.
Na laga foi e le Faamasinoga le tupe lea na tufa mai i le EPC ma fautuaina ai loa Alii ma Faipule e tatau lava ona vaavaai foi o le tagata na tusilima i ai e fai ma sui o Taelefaga i le Malo, o ia lea o loo fesootai i ai matagaluega ma faalapotopotoga a le Malo i soo se atina‘e ae o se taui foi e maua e le nuu.
O le mafuaaga lea o le tāua o le toe faamaopoopo o le nuu. O le faagaulemalie o le Pulenuu e pei ona ia faaalia ai i le tatou Ofisa, o le tele o faafitauli o loo manaomia ai le tutū faatasi o le afioaga ae e foliga mai e lē o malilie nisi e galulue faatasi ma lagalagā ai loa mafuaaga e lē tatau ai ona faatulai ese se tasi ae ua fai.
O lona finagalo i le suavai lea ua autausagā o talosaga ai se fesoasoani i le Malo, o le a saili sa‘o loa e le nuu ni loia e mafai ona faaulu atu se tagi i le Faamasinoga faasaga i le EPC faapea le Matagaluega o Punaoa Faalenatura ma le Siosiomaga.
Faaalia e Tulima, mai i le vaitaimi na faatū ai le afi lenei i le 1993, na molimauina ai loa, a timuga ua poloka le vai lea e sau i Afulilo ma agai mai i le afi lea e i Fagaloa. O le faatanoa e poloka i le otaota ma mafua ai le to‘a ma manogi atoa ai loa le nuu ma e leaga tele le manogi.
E lē gata i lea ua ta‘ua e lenei tamalii le faigata o le suauu ma le otaota mai i le afi o loo faatafea mai i le isi vaitafe o loo agai sa‘o mai i le ogatotonu o le nuu ma agai i le sami.
“Ua mumū uma le gataifale o Tafagamanu, ona o le otaota lea ma ua fia talosaga e avatu i le EPC ma le Siosiomaga, ae e lei iai lava se faiga ua fai i ai.
Ae ua matuā afaina lava le nuu auā e lē mafai ona toe faaaogāina le vaitafe lenei ma ua afaina ai foi le siosiomaga o le sami latou,” o se faaaliga lea a le sui o le Malo.
Ua faamautu e le Siosiomaga ua iai faitioga ua avatu e le afioaga. “Mai i le taimi o Tofilau Eti Alesana, seia oo mai i le taimi lenei, o le tala ua aumai, taatia mai le mataupu a Taelefaga se‘i vaavaai i ai le Pulega o le EPC ma le Siosiomaga.
Peitai e leai lava ma se galuega – seiloga lava ua folafola e le nuu le tapuni loa o le afi i Taelefaga ona faato‘ā o atu loa lea o le EPC ma se tupe ia taofi ai foi iinā se talosaga seia iai se taimi.
Ua tolu nei tinoitupe ua avatu e le EPC i lo matou nuu,” o se saunoaga lea a le Sui o le Malo.
“O le mea la lea ua faapea ai, a mae‘a ona toe fono lo matou nuu ma toe feiloai mo se faaleleiga, o le a agai loa i se loia ina ia mafai ai ona fai se faaiuga a o se tali e maua mai i lenei mataupu”.
