E lei faigata ona faia filifiliga ma talanoaina mataupu faataatitia auā le manuia o le galuega a le Atua i lenei itu o le tovine.
E lē gata na fetaui fola ma ogatasi finagalo faaalia i le aiga faafeagaiga faapea sui usufono, ae leai se peau na lagavale poo se matagi agi faafuasei auā na malū pea le tai a o saunoa le taitaifono, sa faalologo le nuu o le Atua.
O le ‘auga lava lea ma le tali e pei ona onomea ai le sii muamua o le faamua ma le viiga i le Atua e valaauina ai le Agaga Paia na te taimua le faamoemoe.
O le uluai tofiga lea o lenei foi tausaga a le EFKS Pulega a Sisifo. Na amataina i le tofiga a le mafutaga a Tina ona sosoo lea ma le tofiga masani a le Pulega. E 5 aulotu e pei ona tauaofia i le po o le Aso Faraile na tea nei ma le Aso Toonai.
E tusa ai ma ni faamaumauga na tuuina aloaia mai i le failautusi o le pulega, le susuga ia Rev Lance Tautiepa, o le tapenaga mo le faamautuina o le fonotele e pei ona loma nei e usuia i Malua i le masina o Me e pei ona silafia.
O le isi tulaga, o lea mafutaga a le Pulega e faasauni atu ai i le faamoemoe tele, o le faaulufaleina lea o le Ala o le Atua ma le Hall a le Toeaina faatonu, susuga ia Rev Kerita ma le faletua ia Binary Reupena i le aso 29 ma le aso 30 o le masina lenei o Aperila.
Ua māua le tele o Malo asiasi mai mo lea foi faamoemoe i le aai nei o Brisbane ona o le fia molimauina o lea faamoemoe.
Sa faataunuuina faatasi le tofiga a le Pulega a Sisifo ma le Pulega a Matu lea o loo faauluulu i le toeaina ia Rev Lauie Lupematasila ma le faletua.
O lenei foi vaega o le galuega ua ta‘ua o le Tofiga e faalua ona faia i le tausaga, o le masina o Aperila ma le masina o Iulai. O se mafutaga lava na vaaia ai fofoga o le Tapaau i le lagi i le solosolo lelei mai lava i le amataga seia tini atu i le iuga.
O le aiga faafeagaiga o le pulega lea, o le toeaina faatonu o le susuga i le Toeaina ia Kerita ma le faletua ia Binary Reupena, Rev Milo ma le faletua ia Talamasinei Faaleava, Rev Lance ma le faletua ia Lite, Rev Makisua ma le faletua ia Nima Reupena, ma le susuga i le faafeagaiga ia Rev Aofaiga ma le faletua ia Lolo‘u Levi.
O nisi o mataupu e tau lava i le lotifale o le Pulega ia, e lē mafai ona faalauaiteleina, ae sa iu manuia lea mafutaga i le alofa ma le agalelei o le Tama o i le lagi, ma faaiuina foi i se faamalositino na tapenaina lava e le Pulega.