O le aupega sili ona maua mai ai le manumalo, o le mamā o le loto, lelei le loto ma ia mau le loto. O le finagalo lea o le Afioga i le Ao Mamalu o le Malo i lana malelega apoapoai ma faufautua, ae o se tuualalo foi mo le faiaoga, le pulega ma tama uma o le au taitoafitu a le Manu Samoa, a o lei folau atu i Europa mo vae mulimuli e lua o le taamilosaga lakapi taitoafitu a le lalolagi.
O le itu mautinoa o loo maualalo le tulaga o Samoa lea o loo saofai i le sefulu, ma o loo faigata ai foi ona mautinoa pe maua sona avanoa e sao atu ai i taaloga lakapi taitoafitu a le Olimipeka lea ua mautinoa ai avanoa o au e pei o Niu Sila ma Aferika i Saute.
O le malelega apoapoai a le Ao o le Malo sa tuusa‘o ai sona finagalo a o faafofoga tama o le ‘au, le faiaoga ma le pulega i le tapuaia e le atunuu aemaise o o latou aiga o lo latou tautiga o loo tauave ai le igoa o Samoa i le lakapi taitoafitu.
“Afai e tulai mai se tofotofoga, ia tulai mai pea na o mea silisili, e iai outou mātua, outou nuu. O Samoa o le aiga ma le uso, ia oo ifo i le taimi e tofotoina ai, ia tautala mai le agaga lea ia te outou, leaga o lea e faagasolo le poloklame ae taualuga i le tausaga a sau i le Olympics, o le auga lea o le faamoemoe”.
Na malele foi le Afioga i le Ao Mamalu o le Malo ma ia afea le tulaga o le lotoifale o le aulakapi. “Ae soo se vaega lava o le tausinioga o lea e tau ‘ai, e lē gata o luga o le malae ae o totonu o le tou lotoifale.
E lē faigofie foi ona faafoe, o le mea muamua ia fealofani, ia faapena ona maua le agaga o le fesoasoani o le isi i le isi. A oo ina tofotofoina oe ia e manatua mai le tapuaiga, leaga o lea e fai outou ma avefu‘a a le atunuu, auā a lelei outou e tauleleia Samoa”.
O le faamavaega a le aulakapi fitu ma le Tamā o le atunuu le afioga i le Ao o le Malo i le Aso Faraile aso muamua o Me 2015, na faailoa ai foi e lana afioga le latou faamavaega mulimuli ma le aulakapi fitu na fai ai le latou malu taeao a o lei tuumuli, e na o le tasi le keke.
Na faamalulu le Ao o le Malo ma ia faailoa, lona matamuli tele ona sa ia lagona o se vaaiga lea i lona lagona ua lē tapuaia le masii o le ‘au.
Na ia faatonuina lona aiga e faia se suavai ma se ii lelei e momoli i le ‘au, pe lē faaaogāina ae ua silafia e le ‘au o loo tapuaia lo latou masii ese ma le atunuu mo tausinioga i taaloga lakapi faavaomalo.
Ia manuia lau tapuaiga i le toe maimoaina o vae e lua o loo totoe o le taamilosaga, ma ia talosia e tau lau o le faamoemoe ia sao Samoa i le Olimipeka o le tausaga fou.
