T.O.F.A. T(Tumau), O(Onosai), F(Faamaoni) ma le A(Atua). “Tumau i le onosai ma le faamaoni i le Atua”, o le autū lena sa lauga faamavae ai le susuga ia Pr Togamau Tupu Tuia e taumavae ai ma lana matagaluega Aso Fitu Samoa Tutoatasi i le faatasiga a le fale 7 i le sapati aso 14 o Setema 2013.
Na vaaia le laufofoga o nisi ona o le misia o mafutaga ma va-i-vasa. E le gata i lea, ua faamavae foi le faifeau ma lana polokalame tauave o le Upu o le Poto i luga o le leitio ona o le a malaga. Ua valaauina le susuga ia Pr Togamau & faletua ia Ianeta Tuia ma se vaega o le nofoaalo ona o le taitaiina o le matagaluega a Kalaisetete i Niu Sila.
E ui ina taufaafefe le tele o mafuie i lea aai, ae ina ua fesiligia lana auauna poo tumau lava le malaga i le aai malulu, e lei solomuli le faifeau ma le faletua auā na tumau le faatuatua ma saunoa faapea, o le la valaauina, o se lu‘iga tele lea mo i laua a o iai i le galuega a le Atua.
Ua 13 tausaga talu ona galulue i Kuiniselani ma o le a matuā misia le auauna ma le aiga, ae ui i lea ona ua pau o le fesuiaiga o laau o le faatoaga.
E toalua le nofoaalo e lē o malaga ona o galuega, le tamaitai o Juliana ma le susuga ia Chris Tupu Tuia o le Diaspora Manager a le Digicel i Kuiniselani.
Ua faamoemoe o le aso 2 o Oketopa o le a tuua ai Brisbane mo Kalaiesetete i Niu Sila. Tau ina ia agalelei ma ia faamanuia i le galuega fou ua valaauina ai oulua ma le aiga.
E le galo lau galuega lelei sa tautua ai lau susuga e le gata o le galuega a le Atua, ae faapea foi le polokalame i po o Aso Lulu taitasi, le Upu o le Poto.
