E leai a se faatafa ona o le fia lotonuu o le mafutaga a Mulivaitoa Safata i Brisbane e pei ona iai le fia fesoasoani atu i le ekalesia i Samoa. Sa feagai ma le tusigaigoa i le Aso Toonai aso 14 o Setema sa faia lea i Inala.
O le faamoemoe o nei sailiga seleni ona o le faapaiaina o le malumalu Agelo Tausi a le Ekalesia Katoliko a Mulivai Safata, lea ua fuafua i le aso 2 o Oketopa 2013, ma ua sauni malaga ai i Samoa sui o le mafutaga ma se seleni atoa a le mafutaga pe a tusa ma le $30,00.00 pe a mae‘a ona faamaopoopoina.
Sa manuia le faamoemoe i le Aso Toonai e ala i le aao foai o le atunuu faapea aiga, uo ma ē masani ma sa o latou tauaaoina ai se seleni paia e tusa ma le $12,000.00 Ausetalia. O le sui taitai ia Malo Nio Purcell sa feagai ma polokalame uma o le aso ae o le afioga ia Toleafoa Togia sa saunoa faafetai.
O le taitaifono o lenie mafutaga o le susuga Safano Anetelea Lafaele; o le Sui Taitaifono o Malo Nio Purcell; o le Failautusi o Telesia Anae, ma le Teutupe o Katalina Togia.