Ua taloina e le Ofisa Sili o le Faamasinoga, Masinaalupe Tusipa se faatalatalanoaga ma le paia i le afioaga o Lufilufi ina ia tau saili ai se fofo o le faaiuga a le nuu e faatulai ese le Afioga Mamalu i le Ao o le Malo, le Tui Atua Tupua Tamasese Efi mai le afioaga i le faaiuga o le vaiaso na tea nei.
O le Aso Tofi (taimi Samoa) na tu ai le tootoo i luma maota o Mulinuu ma Sepolataemo, o le Maota faasino i le Tui Atua ona o faagaulemalie a le afioaga faasaga i lana afioga.
O mafuaaga nei o le lē malilie o le nuu e pei ona ta‘ua e le Pulenuu o Sele Malala:
Muamua e lē o fiafia le afioaga i le faaiuga a le Faamasinoga o Fanua ma Suafa ua to mai ai le pule o le suafa Seutaatia i le Tui Atua.
Lona lua ua iai le finagalo o le afioaga e tatau ona faanoi le Tui Atua i le afioaga pe a fia fausia sona maota i le eleele lea ua igoa o Mulinuu ma Sepolataemo.
Lona tolu ua tuuaia le soli faavae o le Tui Atua ona o le taumafai e suia tiute o le suafa Poloia o ia lea o le fesootaiga o Lufilufi ma le Tui Atua.
O nei atugaluga uma e ese mai i le mataupu i le Poloia ua mae‘a ona faia i ai faaiuga o le Faamasinoga o Fanua ma Suafa. E pei ona iai le faaiuga e pule Lufilufi i Pāpā o le Tui Atua – o lona uiga o le tofiga o le suafa Tui Atua o le afioaga e iai le pule lea.
O le isi faaiuga ua maoti mai ai o le Tui Atua e pule i le suafa Seutaatia ma o le Maota o Mulinuu ma Sepolataemo o maota e faasino i le Tui Atua.
O le Aso Tofi lea na tu ai le tootoo na taumafai ai le afioaga e agai i le TV Tasi ma le Leitio a le Malo le 2AP e faalauiloa ai le latou faaiuga.
O le tu foi o le tootoo i le maota i Mulinuu ma Sepolataemo i Lufilufi na ta‘ua e molimau e fai lava si mafamafa o lafoga na fai ai e pei o le Soloa ma le Aufuefue o le afioga i le Tui Atua.
E lei mafai ona faatino ia faasalalauga faalauiloa a le afioaga ona o le itu lea o loo taatia faaiuga o le Faamasinoga ua mae‘a ona faia i nisi o nei mataupu ma o le mafuaaga la lea na taofi ai loa ae talia se faaiuga o talanoaga ia ua taloina nei e le Ofisa o Faamasinoga aemaise ai le pulega a alii ma faipule o Lufilufi.
O le taimi lenei ua mae‘a ona faaulufale le Maota Talimalo o le Tui Atua i Mulinuu ma Sepolataemo ae o loo fausia i le taimi nei sona maota tofa.
O le faaiuga ua faasino i ai lea eleele o loo faapea mai ai le Faamasinoga o Fanua ma Suafa, o ai lava e faaee i ai le suafa Tui Atua e pei ona umia nei e le Ao o le Malo Tui Atua Tupua Tamasese Efi, o ia lea e faasino i ai le fanua ma e lē o taatia mai ai se faanoi o sē e tulai mai i lea suafa tāua pe a fia fausia sona maota i ia eleele.
O loo tumau le mau a le afioaga ma o le taumafaiga a le Ofisa Sili o le Faamasinoga ina ia toe talanoa pea ma le nuu ina ia faamalamalama ai foi le faaiuga ua aumai e le Faamasinoga o Fanua ma Suafa mo le silafia atili aemaise o le toe lauliliuina o le tofa i le afioaga e faatatau lava i lenei mataupu.
Ua iai foi ma lipoti ua taunuu mai o loo tau saili le afioga mamalu i le Ao o le Malo i se taofiga faaletulafono o le faaiuga a le nuu ua tulai ai le tootoo ma le faaiuga e soloa ma le aufuefue le Tui Atua.
