Ua lepetia le filemu o galuega fesoasoani a le Koluse Mumu o Samoa i feteenaiga i le va o sui o le faalapotopotoga ma le komiti faatonu, ma o se feteenaiga ua aliali atu ai i fafo le feaina‘i e pei ona faaalia e se tasi o sui o le faalapotopotoga ua musu e faailoa lona suafa.
“O le mea lea na manao i ai le Peresitene ia vevesi ma aliali atu i fafo mea piopio o loo aafia ai nisi o le komiti faatonu e aofia ai ma le Peresitene”.
O le manatu lea o le sui o le Koluse Mumu na talanoa mai i le sui o le nusipepa.
E $8 miliona se fesoasoani o le sunami mo Samoa e ala mai i le Koluse Mumu o loo naunau nisi o le faalapotopotoga e tatau ona fai vave i ai se faatatau a le Peresitene ma lana komiti ina nei mae‘a le masina nei o Aukuso, e lei tuuina atu se fuafuaga faataatia i le ofisa autū o le Koluse Mumu i le faaaogāina o lea tupe tele ona toe faafoi lea o le seleni e lē maua e Samoa.
Faaalia e le Peresitene le Afioga Muagututagata Peter Ah Him, o le tasi lea o mafuaaga o le vevesi ona ua vaai atu nisi sui i le feilafi mai o le 8 miliona.
“Ioe o le tupe lava na te faaseseina le mafaufau, o loo iai tagata eli auro ma eli taimane o loo mafua ai le feteenaiga lenei”.
O le finagalo lea o Muagututagata Peter i lipoti i lena vaiaso ua mavae atu, a o taumafai se fofō o le vevesi.
O le Aso Gafua na tea nei 16 Aukuso 2010 na feiloai ai le Palemia ma itu e lua o le Koluse Mumu o loo feteena‘i i se taumafaiga e saili se toafilemu.
“O le Koluse Mumu o loo auala mai i ai le tele o fesoasoani ina ua mafatia nisi o afioaga o le tatou atunuu i le sunami, ma e lē tatau la ona aafia i ni tulaga faapea auā o loo vaavaai mai faalapotopotoga i fafo na auala mai ai ia fesoasoani”.
O le finagalo lea o le alii Palemia, Susuga Tuilaepa Lupesoliai Sailele Malielegaoi ina ua fesiligia e tusa ai ma lea mataupu.
O loo galulue nei le ofisa o le Loia Sili a le Malo mo le fausia o se fuafuaga e faatu ai se faamasinoga faapitoa poo se Tribunal e soalaupule ai faaletonu e aliali mai i faalapotopotoga tuma‘oti e pei ona saunoa le Palemia.
Ae o vevesi i le lotoifale o le Koluse Mumu a Samoa o loo faapea foi ona tuuaia ai le Peresitene ma nisi o lana komiti i le faaaogā sese o tupe a le faalapotopotoga. Peitai o loo tetee i ai le afioga Muagututagata i ia tuuaiga.
“O le matou komiti e faigaluega lelei uma, o fomai ma accountant e tofu uma ma tupe e maua e oo lava ia te au, matou te lē mananao la i ni seleni”, na saunoa ai le Peresitene.
O loo talosia e le taitai o le Malo i le Palemia, ia vave maua se fofō o le feteenaiga ua oia ai le igoa lelei o le Koluse Mumu a Samoa.
