Na potopoto le toatele o susuga i Faafeagaiga ma o latou Faletua faapea nisi o taitai o Ekalesia eseese i le vaiaso na tea nei i Sini Ausetalia mo le latou mafutaga faaletausaga, le Samoa International Pastors Network 2012, lea sa faataunuuina i le malumalu o le Hope Point Church i St Georges Hall.
O le susuga i le taitaifono, Ps Iliafi Esera ma lona faletua ia Fia, ua silia nei ma le 10 tausaga talu ona la taitaiina lea mafutaga, e mo soo se faafeagaiga mai soo se fata faitaulaga o Ekalesia Kerisiano eseese i Samoa, Ausetalia, Niu Sila, Hawaii, Amerika, ma Amerika Samoa.
E silia ma le 14 ekalesia eseese mai totonu lava o Sini Ausetalia na latou talimalo i le faatasiga, o loo taitai ai le susuga i le faafeagaiga ia Opeta Tautalafua ma lona faletua ia Faalupea. Na vaaia le fealofani ma le galulue faatasi o nei ekalesia eseese e lē gata mo le gaseseina o mea taumafa, ae o le tapenaina ma le faagasoloina o polokalame.
Na amata mai le Aso Gafua, 3 o Setema, ona faaiuina lea i le po o le Aso Faraile o le vaiaso lava lea faatasi ai ma le tauvaga tapolo a susuga a faafeagaiga. E silia ma le 150 i latou na lesitala mo le mafutaga, ae lei aofia ai le au asiasi.
Sa laugaina le upu a le Atua e susuga i faafeagaiga eseese mo le faalototeleina ma le faaaupegaina o le aufaigaluega. Na aoaoina ma fetufaai metotia eseese o auala e fesoasoani mo le galuega a le Atua.
“O le auga autū o le mafutaga, e lē o se faamalu mo ekalesia eseese, ae o se mafutaga saogalemu mo le sootaga, e felosipi ai ma faalototele ai mo le agai i luma”.
O le tausaga e 2013, ua iai nei le faamoemoe e mafuta ai i Amerika i LA. Mo nisi faamatalaga mo le silafia e mafai ona faafesootai le susuga i le failautusi o le mafutaga, Ps Chris Sola, mo i latou i Niu Sila, poo Ps Samoa Unoi i Samoa, Ps Andy Forsgren i Amerika Samoa, Ps Dan Magalei i le USA ma Ps David Katina i Hawaii.
