Pe tusa o le tolu i le aoauli o le Aso Tofi o le vaiaso talu ai, na faataunuuina ai se taaloga mataina i le va o le Aoga Maualuga a Wesley College i Pukekohe ma le Kolisi Maualuga a Nuuausala na masii mai i Samoa.
O lenei taaloga na faato‘ā fuafuaina i se taimi puupuu ina ua lē mafai ona faataunuuina le taaloga sa fuafuaina e feiloai ai Nuuausala ma le Kolisi maualuga a Southern Cross i Magele.
Na saunoa le Pule aoga a Nuuausala le Susuga ia Rev Fuatimu Posese e faapea, o se avanoa tāua na mafai ona malaga mai ai le Kolisi mai Samoa, aemaise ai le atinaeina o lenei taaloga i totonu lava o le Kolisi a Nuuausala. Na faafetaia foi le Ekalesia EFKS Aoao i le taliaina o se faatalosaga i se avanoa e malaga masii mai ai se au lakapi 1st XV a Nuuausala i Niu Sila.
E lua vaiaso na faagasolo ai ni taaloga i laufanua o Aukilani i Niu Sila ma nisi o Aoga maualuluga, ma na molimauina i totonu o lea lua vaiaso o taaloga, le malosi tele o le au masii mai Samoa, ina ua toe taliu nei i Samoa ae e lei mafai ona faatoilaloina.
I lana taaloga mulimuli ma Wesley College 1st XV, o se taaloga mataina na maimoaina e le toatele le tau fai lelei o ‘au e lua.
Na mae‘a le taaloga ona valaaulia aloaia ai lea o Nuuausala 1st XV i se taumafaga ti māmā i Wesley College lava, faatasi ai ma le faatinoina o faaaloaloga masani i soo faapea.
O le afiafi lava lea ina ua mae‘a le taaloga na faia ai le fiafia tele faamavae a le Ekalesia EFKAS o loo tausia e le Toeaina Rev Mafutaga Faaleaoga ma le Kolisi a Nuuausala.
Na faailoa foi e le Pule aoga a Nuuausala ua mae‘a tuuina atu foi ni valaaulia i aoga na soo i Niu Sila, e mafai ona malaga atu mo ni taaloga i Samoa pe a talafeagai ai.
Na faaiuina le Malaga e aunoa ma se isi o faamanu‘aliaina i le agalelei o le Atua.
