O teuga ma le laeiina e tina ma tamaitai Pasefika mai Ekalesia eseese i totonu o le aai Porirua ma nuu tuaoi o le lanu piniki e faatāuaina ai le polokalame o le Pinikilicious, o se vaaiga matagofie lea sa iai le Aso Toonai na mavae atu nei, e pei ona ua tolu nei tausaga talu ona faavae mai.
O lenei polokalame o le Pinikilicious e faalauiloa ai le faatāuaina o le itu tau soifua laulelei ma le soifua maloloina o tina ma tamaitai Pasefika i totonu o Ekalesia, nuu ma aiga.
O se polokalame o loo galulue faatasi ai le komiti faafoe o le Pinikilicious ma faletua mai Ekalesia eseese totonu o Porirua.
E lē gata i le faatāuaina o le sao o tina ma tamaitai i le itu faaleagaga, ae faapea foi le faatāuaina o le itu faaletino, i le unaia malosi lea o tina ma tamaitai mo a latou siaki ma faatalatalanoa ai aafiaga ma togafitiga o le mau faama‘i o loo aafia ai pea le toatele aemaise lava le faama‘i o le kanesa, lea ua tele ina lamatia ai le soifua maloloina o tina o le Pasefika.
Na saunoa le taitaifono o le Pinikilicious, Faletua Sueina Mapusua e faapea, e ova ma le fitusefulu le fuainumera o tina ma tamaitai Pasefika sa oo atu i le Ofisa o le Soifua Maloloina mo a latou siaki talu mai le polokalame Pinikilicious o le tausaga ua mavae, peitai o loo itiiti pea le fuainumera o pasene o tina ma tamaitai Pasefika o loo agai mo a latou siaki i tausaga uma.
O le ala lea o le unaia malosi pea o lenei polokalame auā o loo telē pea le aafiaga o tina Pasefika o loo maliliu i le ma‘i kanesa o le susu, pe a faatusa i tina ma tamaitai papalagi ma isi atunuu.
O le maota o le Ekalesia P.I.P.C i Cannons Creek, Porirua taitaia e le Faletua Faaolataga Leasi na faatautaia ai lenei polokalame Pinikilicious o lenei tausaga. E ova atu ma le sefululima laulau eseese sa faapea ona faalauiloaina ai ituaiga polokalame eseese mai meataulima e oo atu i le gaseseina o mea taumafa i le itu tau soifua maloloina, e pei o le fuaina o le toto, faamatalaga o le taofiina o le taumafa tapaa faapea faamatalaga faasino le itu tau i le toto maualuga ma le suka. E lē gata i lea ae o faamatalaga auiliili i le puipuiga mai le ma‘i o le kanesa ma isi faama‘i eseese o loo tele ina aafia ai tina ma tamaitai Pasefika.
Sa faapea foi ona maua le avanoa e nisi o tina e faia ai o latou teuga i lauao faapea le faamanaiaina o fofoga i le faaaogāina o vali ma kulimi e aogā mo le tino ma le ola maloloina.
Na fai foi siva faamalositino, siva Samoa faapea tautalaga mo polokalame eseese mo fuafuaga ma le autu ola laulelei ma le soifua maloloina.
Sa auai atu foi faiaoga ma teine aoga o loo aoaoina i le tusipasi tausimai mai le aoga Whitireia e faia siaki.
Sa auai atu foi i lea aso le sui o le Palemene mai Mana, le afioga Kris Faafoi e lagolagoina lenei polokalame aemaise le faatāuaina o tiute tauave faapea le sao o tina ma tamaitai Pasefika totonu o kominiuti ma Ekalesia i Porirua.
Sa tatala aloaia le aso i se sauniga lotu na taitaia e faletua o faafeagaiga o loo lagolagoina lenei polokalame ona sosoo ai lea ma faamatalaga ma auiliiliga o mataupu mo le fesoasoani tele i tina ma tamaitai Pasefika, ia silafia le tāua o le faatinoina o le faia o le siaki, vaaia o fomai, faataua o le faata, ma le lesitalaina o suafa mo siaki eseese.
O le itiiti pea o le fuainumera o pasene o tina ma tamaitai Pasefika o loo agai mo siaki i tausaga uma ma le telē pea o le numera maliliu o tina ma tamaitai Pasefika mai le mai o le kanesa o le ala lea o le unaia malosi o lenei polokalame totonu o Ekalesia.
Sa faapupula atili e le taitaifono o le Pinikilicious Faletua Sueina mai le Ekalesia Katoliko Tawa le aano tonu ma le faamoemoe o le aso, sa tuulima i ai le komiti faafoe mo galuega ma polokalame faataatitia mo le alumaga o lenei galuega faaolaola i totonu o Ekalesia e amanaia ai le faatāuaina o le sao o tina ma tamaitai.
Saunoa Faletua Sueina e faapea, e tasi lava le aso o le tausaga e laeiina ai le lanu piniki, sei, ula ma teuga piniki eseese e faamanatu ai le tāua o lenei polokalame ma manatua ai foi tina ma tamaitai Pasefika uma ua maliliu ona o lenei ma‘i o le kanesa.
O le tele o finagalo faaalia o latou sa auai i lea aso, le matagofie o lenei polokalame i ona tapenaga ma le faamaopoopoina.
Na saunoa le faletua Penina Vailaau, Ekalesia E.F.K.S Waitagirua e faapea, e tele lava auala eseese mai le polokalame Pinikilicious e unaia malosi ai tina ma tamaitai e ala i le toaaga e faamalosi tino, ala mai i feau ma galuega i totonu o aiga, aemaise lava le itu tau gaseseina o mea taumafa mo le ola maloloina.
Sa ia momoli foi le faamalo i le komiti o le Pinikilicious mo le aso matagofie aemaise foi auaunaga aogā mo le komiuniti o Porirua aemaise tina matutua mai Ekalesia eseese sa faapea ona au atu e lagolagoina lenei faamoemoe.
E ova atu ma le selau tina ma tamaitai sa lesitala i lea aso ma auai atu e sapasapaia le polokalame Pinikilicious. O le faamoemoe o le komiti mo lenei polokalame o le faalauaiteleina lea i le tausaga a sau aua o loo iloa nei o se tasi lea o auala o se fesoasoani tāua mo le puipuia o le soifua maloloina lelei mo tina ma tamaitai Pasefika i totonu o Porirua. Ma ia galulue soosoo tauau pea ma Ekalesia eseese auā le faatinoina o lenei polokalame.
