Se mea ina a lelei o uso ae nonofo faatasi, e maua ai le fefaamafanafanaai ma le galulue faatasi. Ae o le upu foi a le tusi, aua ne‘i tuua le mafuta faatasi o le auuso. O le tofa mamao o le aiga o Futi Talifaaifo i Faleu i Manono, aua ne‘i motusia le sootaga vavalalata o tagata matutua aemaise ai o a latou fanau.
O le mafuaaga foi lea o le faia ai o lotu faamanatu a le aiga i tausaga uma ina ia sosoo pea lea mafutaga (Family Reunion). O le tausaga e 1912 i le aso 10 o Aperila na amata mai ai le lotu faamanatu a lenei aiga ina ua malolo ma foi mai Futi Sapati ma Faiane mai le galuega a le Atua.
O le afiafi o le Aso Faraile na toe alaga ai pesepesega mālie ma le viiga faafetai i le Atua ina ua mafai ona toe feiloai suli uma o Futi Talafaaifo i le hall a le aoga tulagalua a Papatoetoe North i Papatoetoe.
O aiga na malaga mai i Ausetalia, Amerika, Ueligitone, Kalaiesetete, Dunedin faapea i latou uma o loo nonofo i Aukilani. Sa faatasi mai ai foi ma le Sa‘o o le aiga o loo tausia le aiga i Samoa, le tofa ia Futi Faatau ma le tausi ia Alii Faatau.
O se aiga toatele ma le maopoopo auā e lē misi lava se tausaga ma maua lea feiloaiga, ua lē gata i le tāua e fealofani ai aiga ae ua maua ai foi ma le avanoa e iloa ai e le isi aiga le isi aiga. E fitu faletama o loo aofia ai i totonu o lenei lotu faamanatu.
Ma o le afiafi lea na tatala aloaia ai lenei mafutaga i le lotu na taitaia e le susuga i le faafeagaiga ia Rev Faleu Tausa Futi, ma amata ai loa ona feiloai aiga uma ma talatalanoa.
O le taeao o le Aso Toonai na toe alafai ai i le sauniga lotu i le taeao, ma sosoo ai loa ma le malu taeao, ma faagasolo ai taaloga, ae taualuga i le taumafataga o le aoauli. O le afiafi na faatinoina ai siva ma pese Samoa faatasi ai ma le talaaga o le lotu.
O le Aso Sa na taualuga ai le faamoemoe o le aiga, ma sa amata i le latou lotu faafetai i le taeao i le 5am ma faamauina ai le anapogi a le aiga atoa ae tatala i le 12 i le aoauli, o le aso foi lea na fai sauniga faatasi uma ai faletama nei e fitu o i latou sa tupuga mai ia Futi Talifaaifo.
O le aoauli na tatala ai loa le anapogi ma fai ai ma le toonai ma faaiu ai upu taumavae, ma toe talatalanoa ai mo le faamoemoe i le tausaga fou. O se fiafiaga i tamā o loo tausia le aiga iinei le tofa ia Tele‘a Tali ma Talifaaifo Fa‘ifa‘i Salesa, o le maopoopo ma le naunau o aiga e mafuta i tausaga taitasi, ae lē gata i lea ua maitauina ai le tupu ma le uluola o le aiga, ma ua toatele foi i latou ua faamanuiaina i galuega lelei aemaise ai tamafanau ua galulue i le galuega a le Atua.
