E iloa oe i lau gagana e iloa foi i ta‘ua i le ava fatafata
O le fesiligia poo le ā ea lau gagana poo lau aganuu foi, ua leai ma se eseesega ma le fesili, Poo ai ea oe? Auā ua lē mafai ona iai se aganuu e aunoa ma le tagata. Ua lē mafai foi ona iai se tagata soifua i se atunuu e aunoa ma se aganuu poo se gagana.
O le aganuu poo lau gagana foi na te faailoilo, faamaopoopo ma pulea le tamaliiaga o ni tagata soifua i se atunuu poo se faalapotopotoga o ni tagata ua ese mai isi atunuu, poo isi foi faalapotopotoga.
O le faa-Samoa o le olaga lea ua ola ma soifua ai tagata Samoa, ua avea lea olaga ua pei o se tulafono mo tagata Samoa uma e pulea ai o latou olaga.
E pei la o lenei vaiaso ma le faatāuaina o le gagana Samoa i Kalaiesetete, sa alo atu i ai le matagaluega o mataupu tau Pasefika (Pacific Studies ) i totonu o le Iunivesite o Canterbury lea o loo taiulu ai le alii polofesa mai Rusia o Serge, e fai paolo o ia i se tamaitai Samoa.
Sa muai tatalaina i le faatinoina o le ‘ava o le feiloaiga i le afiafi o le Aso Gafua aso 31 Me 2010 i le MacMillan Brown i totonu lava o le Iunivesite. O lea faiga ua na o se vaaiga se‘i faailoa ai i alii ma tamaitai papalagi le faafeiloaiga o ni malo asiasi pe a ulufale i Samoa.
O lenei polokalame atoa sa saunia lava e le alii taiulu o Serge, ma sa valaaulia ai le aufaigaluega ma faiaoga o le matagaluega o le Pacific Studies, o le afioga Lepule Gali (o loo aotauina foi i le Iunivesite) sa fai ma fofoga fetalai o le po ma avea foi ma faamatala upu e fesoasoani ai i le alii pule mo le gagana.
Sa auai le afioga ia Memea Maaelopa, o le faufautua o le asosi a alo ma fanau Samoa o loo a‘otauina i le Iunivesite faapea le asosi (Samoan Students Association) e lagolagosua, o le sui o le nusipepa le susuga Pio Liaina sa fai ma malo usu, ae na faatino uma lava e le Pacific Studies le polokalame atoa.
Na mae‘a le ‘ava o le feiloaiga ona alo atu lea i se taumafataga faa-Samoa i lea afiafi, ma o le aso na sosoo ai sa feagai ai ma le soalaupuleina o nisi o mataupu tāua sa faatautaia lea e Dr Iati Iati.
Na faapea foi ona iai ni displays eseese aemaise o ni tusitusiga faa muagagana ma alagaupu, o ni tautalaga tāua e uiga i “Women in Business Development in Samoa”, auā lava le faailogaina o le faatāuaina o le gagana Samoa.
O le afiafi o le Aso Faraile sa taualuga ai i faafiafiaga ma siva faa-Samoa ma faaiu ai loa i se taumafataga felanulanuai faa-Pasefika na saunia ma sa fiafia uma ē na mafai ona auai, e ui lava i le louloua o timuga ma le matagi, ae sa lē taofia ai le faataunuuina o le molimauina o lenei vaiaso tāua.
Ae o le agaga maualuga o lenei vaiaso o le faamanatu ma le faatāuaina o le a‘oa‘oina o alo ma fanau i le gagana Samoa, ma ia taumafai e faamausali ina ia avea ma ana gagana muamua a o soifua ma ola ai i totonu o atunuu Europa.
E iloa oe i lau gagana, e iloa foi oe i le ava fatafata.
