O le Maea Fusu fou faato‘ā faalua ona faia ni ana fusuaga talu ona tatalaina i Aukilani Sisifo ua faaigoaina o le Plantation Boxing Gym, lea o loo taiulu i le afioga a Tuigamala Vaaiga Tuigamala, lea ua maitauina le ono tulai mai ai o se isi David Tua o le lumanai.
O le alii talavou o Alex Su‘a Junior e na o le 19 tausaga lona matua, o se alo foi o se tasi o tamalii iloga i le taaloga o le faipele i ona foi vaitau, le susuga a Alex Sua, lea foi e tele ina vaaia i le tulimanu a Toaletai i taimi o ana fusuaga na tea atu i Niu Sila nei.
O le faalua lea ona maitauina e le Tala o taaloga a le Samoa Times le alii talavou lenei, ae peitai e tusa ma lipoti mai ia Tuigamala na ia ta‘ua ai, e lei faiaina lava i lana aupaga le alii o Alex Junior i totonu o Niu Sila atoa.
A o le molimau a le Tusitala na matuā maofa lava foi i le vave, lelei le vaai, manaia le fuaitino, malosi i le taimi e osofai ai lana paga i tu‘i faatasi ai ma le lē fefe, ma e matuai telē le avanoa e ono tulai mai ai o se isi David Tua o le lumanai.
O le faiaoga o le alii o Alex Junior o se tasi foi o faamatua i le taaloga le susuga a Maselino Masoe, lea ua ave uma i ai lona silafia mo lenei alo talavou o le atunuu, o Alex Jr na soifua mai lava ma aoga i Niu Sila, ae e malosi tele lona tuaa ia Su‘a e unai i le tu ma le aga faa-Samoa faapea ai foi ma le taaloga o le faipele.
O le po o le Aso Toonai na tea nei i le Faletaalo a Kelston Boys High na toe manumalo ai foi le alii o Alex Junior i le la paga ma se tasi o alii Tonga ina ua mae‘a taamilosaga e tolu i ‘ai, ma ia maua ai le Ipu o lana aupaga o le Lightgrueiser, talosia ae tumau ai pea le lelei ma le naunau o lea alii talavou, ma ono sosoo ai pea le fau ma le fau i tamafanau a Samoa i lea faagatama.
