O le vaiaso lenei ua faagasolo ai se faalauiloa i le faamanatu ai o le aso ua faatāua ai i latou e ofo atu le toto mo togafitiga o isi. O se faiga ua vaaia ai le tutufaatasi o le Faalapotopotoga Fesoasoani a le Koluse Mumu i Samoa faatasi ai ma le vaega o auaunaga faafomai a le Soifua Maloloina.
O se solo tele na faatautaia i le aso ananafi e amata ai lenei faalauiloa ma na uia ai le alatele i le taulaga o Apia ma agai atu ai i luma o le Maota o le Malo i le Eleele Fou. O iina na faatautaia ai se sauniga e talosia ai le soifua maloloina lautele o le atunuu ma faafetaia ai i latou ua faapea ona agai e fai lenei fesoasoani o le ofo atu o le toto mo togafitiga moomia.
O le toto o le ituaiga o le “O” na faapea ona ta‘ua le moomia tele ona o le toatele o le atunuu e iai le ituaiga toto lea ma o le galuega la na amata mai i le falemai tele i Motootua na tatala ai le avanoa mo le atunuu e ofo atu o latou toto.
Sa faia muamua sailiiliga ina ia mautinoa o le toto e ofo atu o loo lelei atoatoa auā e iai isi mataupu ua tulai mai ua maua ai i suesuega o loo iai gasegase e maua mai i nisi o toto o loo tui mo lea galuega laveai.
Faaalia e le Koluse Mumu le tele o le manaoga o lenei fesoasoani ma e ese lava le toto o loo taofia ma saili e le Koluse Mumu, ese foi le toto o loo talia e le soifua maloloina pe a agai sa‘o atu le atunuu e tui o latou toto i le falemai tele i Motootua.
Faaalia e le alii Minisita o le soifua maloloina le afioga Tuitama Dr Talalelei Tuitama, ua iai nei se fuafuaga ina ia faamautu se polokalame e mautinoa ai o le toto e tui atu mo togafitiga o loo saogalemu.
O le manatu foi ua laga i tausaga ua tuanai faatatau i le faatau o le toto na ta‘ua e le tamaitai ofisa sili o le Koluse Mumu i Samoa, le Afioga Namulauulu Talalelei e faigata tele lea tulaga ona o le a maua ai ma tagata o loo mama‘i ae ua agai ane e tui o latou toto ona o le tupe.
O le taimi lenei e to‘a 3000 tagatānuu o Samoa ua lesitala i le taumafaiga lava ia a le Koluse Mumu e ao paina toto mo togafitiga i falemai ma e fai ma sui ona o le toatele e saili atu ua malaga i atunuu mamao ma o le faalauiloa la i lenei vaiaso lea ua faapea ona faaopoopo ai ma le numera o i latou ua faapea ona ofi atu i le lesitala lea mo le tui o le toto auā togafitiga.
