O loo tau fofo pea faafitauli o loo aafia ai fanau aoga i feeseeseaiga, ae e iai foi mataupu e aafia ai faiaoga ua oo i le tulafono. E pei o le mataupu na tulai ai se alii faiaoga o le Kolisi Maualuga o Avele ina ua ia faaoolima i ni teine aoga se toafā o lana vasega. O lē ua molia o se tane o Matautu-tai ma Leufisa o Mefiposeta Su‘a Stowers e 39 tausaga le matua, e fai le aiga ma le fanau e toatolu ma o loo galue o se faiaoga o le malo.
Ua faamaonia e le Faamasinoga Faaitumalo moliaga e fā o le faaoolima faasaga i lē ua molia ina ua ia ioeina i le aso 26 o Me o le tausaga nei. O i latou e toafā na aafia i lenei mataupu e i lalo o le 14 i le 15 tausaga le matutua ma o loo aooga nei i le Kolisi o Avele i le vasega Tausaga 10 poo le Year 10, lea sa faiaoga ai lē ua molia.
E tusa ai ma le tolaulauga o le itu a leoleo i luma o le Faamasinoga e faapea, o le aso 14 o Mati 2015 i le itula e 10 i le taeao na tulai mai ai lea mataupu. O lē ua molia sa fai lana mataupu o le Agriculture i lana vasega ma o loo iai i latou na aafia.
O le aso lava lea sa iai le alo o lē ua molia e 3 tausaga i lana vasega ma sa ia faatonuina ai le vasega e ō e la‘u mai ni maa. Peitai, na tamoe mai le atalii o lē ua molia o loo tagi ma ta‘u i lona tamā sa faalili o ia e i latou na aafia.
Na toatamai ai loa lē ua molia ma laa atu loa ma le laau ma faia ai loa lea faaoolima i lona sasaina o i latou na aafia. Faaalia i le ripoti a leoleo o manu‘aga o i latou na aafia, o le isi o lona lima ma lona nofoaga ua faamanu‘alia. O le isi na aafia o lona tau‘au ma le lima faatasi ai ma le isi toalua o la lima taumatau na sasa ma sa faalogoina le tiga.
Na ta‘ua foi e le itu a leoleo, ua oo atu foi tusi talosaga o nisi o mātua o i latou na aafia e talosaga e toe faaui i tua lenei mataupu. Na tutulai foi i luma le Faamasinoga nisi o tuaa o le fanau na aafia e faamaonia, na oo atu le faiaoga poo lē ua molia e faatoese atu i latou aiga e tusa ai ma le mataupu na tulai mai. Na uia foi auala faaleaganuu ma ua mae‘a ona teuteu ma sa faamalūlū foi i latou i le Faamasinoga e tusa ai foi ma aga o le fanau ua mafua ai ona molia lē ua tulai.
Sa faatoese foi le alii faiaoga e tusa ai ma lana gaioiga sa fai ua aafia ai le fanau aoga. Ua ia faatamala i lana tautua a o galue ai o se tagata faigaluega o le malo ma ia faatoese ai foi i mātua o le fanau na aafia i le tulaga na tulai mai. O se aoaoga tāua foi i lona olaga a o avea ai o ia o se faiaoga ma o le a ia lē toe faia.
I le saunoaga o le Alii Faamasino le Afioga ia Fepuleai Amperosa Roma e tusa ai ma le ripoti o le ofisa o nofo vaavaaia, o loo fa’amauina ai le faamatalaga o lē ua molia le mafuaaga o lea faaoolima. E faapea, na savali atu lē ua molia e tau mai le lala tamaligi ae faalogo atu i tamaitai e toafā o lana vasega o taufaalili ma lafo ni upu taufaamata‘u i lona atalii, ma mafua ai lea solitulafono.
O loo ta‘ua foi i le ripoti o le ofisa o nofo vaavaaia, le mafuaaga na alu ai lē ua molia ma ave lona atalii i le aoga ona sa faama‘ima‘i. O loo manino foi i le tolaulauga a leoleo na tamoe atu lona alo o la e tutulu e foliga mai na faia i ai e se tagata se mea.
Na saunoa lana Afioga i le Faamasino, ua na o le faiaoga e leaga le mafaufau e faaoolima i se tamaititi aoga e aunoa ma se mafuaaga. O le galuega faafaiaoga e lē o se galuega faigofie ona e fai o le taufaavasega o aga eseese o tamaiti i le tautalaiti ona e eseese faleaoga e omai ai.
Sa faamanatu ai e le Alii Faamasinoga le Afioga ia Roma, i lē ua molia e lē o se mafuaaga talafeagai e faaoolima ai i soo se isi lava. O lana galuega o le aoaoina lelei o le fanau ma o le naunautaiga lava o le faiaoga o le fesootai lelei ma le fanau.
O itu ogaoga o lenei mataupu, ona o le fanau o loo i lalo o le vaavaaiga a le faiaoga, e faafā ona faia le faaoolima ma e toafā foi i latou na aafia.
O itu lelei, o le ioeina e lē ua molia i le avanoa muamua, taimi muamua faatoa tulai ai, e tasi lava le moliaga ae e faafā ona faia ma le vaega tāua ua uma ona oo lē ua molia i aiga o i latou na aafia ma faatoese ai ma o lea na tulai foi i le Fa’amasinoga nisi o tuaa ua atili ai ona faamaonia ua uma ona soalaupule le mataupu.
E lelei le talaaga o le soifua o lē ua molia, e 7 i le 8 tausaga talu ona faiaoga ma ua loa foi lona soifua o avea ai o ia ma faiaoga. Ua mae’a foi ona faia le faaiuga o le Matagaluega o Aoga i lē ua molia mai le aveeseina mai le Kolisi o Avele ae ua faaauauina lana tautua i le Kolisi o Anoamaa.
O lea ua talafeagai ai le faaleaogaina o le moliaga e aunoa ma se faamaumauga faasolitulafono. Na tuualalo ai le Faamasinoga ia Mefiposeta ina ia faaaogā tatau le avanoa ua tuuina atu, auā e toe tulai loa e lē toe iai se avanoa.
