O le Enua Ola o se polokalame faalesoifua maloloina ua fitoitonu lana auaunaga i le faatāuaina o le ola soifua lelei o le tagata i soo se vaega, e ala lea i le faia o ni polokalame faagasolo i totonu o le community.
E aofia ai faamalositino, tausisi i taumafa paleni, taofi le taumafa tapaa, faaitiitia le tagofia o le ‘ava malosi, faatāua le āsia o fomai faaleaiga aemaise ia tele le taimi e mafuta ai ma le aiga.
O se polokalame o loo faatautaia ma faatupuina e le Waitemata District Health Board, ma ua silia nei ma le lima tausaga o faagasolo, auā lava le aoaoina ma le uunaia o le soifua maloloina lelei mo tagata Pasefika o loo alala i Aukilani i Sisifo ma North Shore.
Talu ona faavaeina mai le polokalame a le Enua Ola ua iai ni faailoga taualoa ua manumaloina e lenei polokalame faalesoifua maloloina, e iai le Health Excellence Award 2010 recipient for “Highly Recommended Programme”, o le Harbour Sport Community Excellence Awards 2011 – Highly Commended Community Initiative ma ua maopopo foi lona faagasologa i totonu o Ekalesia ma nisi o faalapotopoto o loo ua latou galulue faatasi.
Ua mafua lea tulaga, ona o se talosaga mai a le Malo i le Matagaluega o le Soifua Maloloina ina ia faatalanoaina ni auala e mafai ai ona galulue faatasi le community, e foia le faafitauli o le tino puta, toto maualuga, suka ma le tele o gasegase ua aafia ai nei le toatele o tagata o le Pasefika i totonu o Niu Sila.
E 34 vaega eseese ma Ekalesia o loo auai i le polokalame a le Enua Ola, e pei o le faaitu i North Shore (Pacific Integrated Health Care), 10 vaega eseese ma Ekalesia, o Aukilani i Sisifo (West Fono Health Trust Henderson) o loo iai Ekalesia ma vaega eseese e 24.
Ua maitauina le faatupulaia o le fuanumera o tagata Pasefika ua auai ma faatāuaina avanoa faapenei e faamalositino faatasi ai ma fiafia uma ai le aiga, auā e lē gata o le faamalosi o le tino, o le agaga, le mafaufau ma le ola fuataina i tulaga lelei mo le atinaeina o le ola soifua manuia o le tagata mo le lumanai.
O le 2012 na amata talanoaina ai e le Falemai faaleitumalo o Waitemata le faatinoina o se polokalame mo aiga, e fai faatauvaga ina ia taiala i aiaiga ua faataatitia e le polokalame, e fesoasoani i le faaitiitia o le tino puta ma le aoaoina o le taumafa i meaai paleni ma faagasolo pea aoaoga faalesoifua maloloina ma le faamalositino, peitai faatoa faataunuu lea fuafuaga i le tausaga nei.
O lea polokalame ua faaigoaina o le Enua Ola Aiga Challenge, e 652 tagata taitoatasi na lesitala mo le faamoemoe, e aofia ai ma le to‘a 6 o tuaa matutua ua silia ma le ta‘i 80 tausaga, ae lē mafaitaulia ai le tupulaga talavou ma le fanauiti. O se fuainumera maualuga pe a faatusa atu i tausaga ua mavae i le aofaiga o tagata e fia auai i polokalame faamalositino faapenei, peitai ua telē le aoaoina o tatou tagata Pasifika i aoaoga faalesoifua maloloina ma ona aafiaga. O le a ala foi lea ua faaauau ai pea le tautua a le Enua Ola mo tagata lautele. E ese foi le vaaiga i lea po, i le sagisagi fiafia o tagata uma ma aiga, aemaise o le tulimatai o iuga o a latou taumafaiga, ua tele ni vaiaso o tauasa ma koleni mai, ma e lē faigofie le taumafai e lusi le pauna ma tausisi i meaai paleni. O se tasi foi nei o auala faigofie ua faaaogāina e le Waitemata District Health Board ua mafai ai ona taaofai ni faamaumauga mautinoa e ala lea i le tusitusia o le mamafa o lea tagata, o lona umi, faapea lona lautele mai suilapalapa, auā faamaumauga tusitusia mo le Matagaluega o le Soifua Maloloina.
O le Enua Ola Aiga Challenge na amata mai i le aso 6 o Me seia faamae‘a i le aso 30 o Iuni, lea la na iai le latou laugatogi sa faia i le afiafi o le Aso Toonai o le faaiuga o le vaiaso na tea nei i le West Wave Recreation Centre i Henderson, e faamae‘a ai le latou polokalame.
O se faamoemoe ua tino mai ma ua iai ni iuga lelei e faafiafiaina ai o tatou tagata Pasefika i le faaitu i Sisifo o Aukilani faapea ma le North Shore.
O le iuga la lea o le laugatogi a le Enua Ola Aiga Challenge i le po o le Aso Toonai na tea nei:
Inspirational Individual Winners
Senior
Vaivase Suaniu (73 – F)
Pacific Island Presbyterian Church, Glenfield North Shore
Male
Alofa Faamoana (36 – M)
New Lynn Seven Day Adventist Church, West Auckland
Female
Emi Suaniu (48 – F)
Pacific Island Presbyterian Church, Glenfield North Shore
Youth
Sesilia Vagana (10 – F)
Pacific Island Presbyterian Church, Glenfield North Shore
Biggest Waist Reduction
Sam Tinilau (56 – M)
West Harbour Congregational, West Auckland
Group Awards
Supreme Awards
Pacific Island Presbyterian Church Glenfield North Shore
Wild Card
New Lynn Seven Day Adventist Church, West Auckland
Highest Percentage Weight Loss Group
Pacific Island Presbyterian Church Glenfield North Shore
