Taualuga le polokalame “Measina a le Atua”

O le lua vaiaso talu ona faasavali mai le polokalame ua faaigoaina o “Measina a le Atua” na faamae‘aina i le Aso Sapati aso 3 o Aukuso. E lua ekalesia Aso Fitu o le toe afio mai Koneferenisi sa tuufaatasia e iai ekalesia a Ipswich ma Riverview mo lea faamoemoe.
E iai le talitonuga i afiafi taitasi sa tulimatai le toatele o tagata e faatasi atu auā na manino ma logomālie le folafolaina o le upu a le Atua. E leai se tasi na foi fua, auā na toe lalaga ma faamanatu e lana auauna le tele o measina a le atunuu e tomua ma fesootai i ai mataupu o po taitasi, o se tulaga talafeagai ma le tomai faapitoa na tuuina e le Atua i lana auauna e faasoasoa ai le upu na avea lea ma ala na taupati atu ai le toatele o tagata, ae o loo afifi ai se feau sili ona tāua i taimi faigata ua tatou ola ma soifua ai nei.
O le failauga faapitoa o le susuga i le faafeagaiga ia Pr Tusitina Faiumu, ae o le susuga ia Pr Samuelu Afamasaga sa fai ma organiser. Na toatele i latou sa lolofi atu e fia faafofoga i le faasoaina mai o measina a le Atua, ma sa lē gata ina laulelei i taumafa faaletino i po uma, logomālie pesega a le susuga ia Tuuu Ierome ma le aufaipese, ae na sili ona osaosa ato i taumafa faaleagaga.
E toalima agaga fou sa papatisoina ma na amataina i le manuia, faaiuina i le fiafia le folafolaina e lana auauna o Afioga mamana a le Atua.