O le faaiuga o le masina o Me, agai i le amataga o Iuni i tausaga taitasi, o le vaiaso atoa lea ua faapitoa e Niu Sila e faamanatu ai le Gagana Samoa i totonu o le atunuu atoa.
O le faamanatuina o le Gagana Samoa, e lapataia ai tagata uma o soo se lanu ma soo se gagana, ina ia faaaogāina le gagana Samoa i fesootaiga pe afai e mafai ona fai.
E le gata i lea, ua iai lava upu Samoa, ua mae‘a ona faatulaga mai e le Komisi ma le Matagaluega o Aiā Tatau, ma le fesoasoani a le faalapotopotoga a le FAGASA, e ao i tagata uma, ona faaaogāina i lea vaiaso faapitoa.
O le agaga maualuga, ina ia faataunuu pea aiaiga ma vaega o le faatāuaina o le Gagana Samoa i Niu Sila.
O lea fuafuaga e laugatasia uma ai tagata uma, e oo lava foi i Sui o le Palemene, Faauluuluga o Matagaluega taitasi, faapea totonu o aoga ma galuega.
O le Gagagna Samoa, o le gagana lona tolu lea, ua ave i ai le faaaloalo a le Malo o Niu Sila, ma ua faamalosia foi le aoaoina i totonu o aoga, e ala lea i le iai i totonu o le tusi tumau o aoaoga.
O le gagana Peretania o loo ave pea i ai le faamuamua, ona sosoo ai lea ma le gagana a Maori, ona pito lea i ai ma le Gagana Samoa. O le faitau aofai o tagata Samoa i totonu o aukilani, o loo iai foi i le tulaga lua, i le faitauga o le faatoateleina ma le faatupualaia.
O tagata mai Asia ua saoasaoa tele lona faitau aofai, ae o Samoa e aupito toatele i lenei itulagi ma tagata Pasefika.
O le vaiaso nei, na amata i le aso 27 o Me, ae faatoa faamae‘a i le aso Tolu o Iuni, le vaiaso faamanatu, ma le faatāuaina o le Gagaana Samoa.
E tele ma anoanoai aoga, ma faalapotopotoga o loo faia ma tapenaina sauniga faapitoa ma gaioiga e faamanatu ai, ma faailoga ai le gagana i lenei tausaga.
O totonu foi o Iunivesite ma aoga maualuluga e oo lava i aoga amata, o loo faia ma faatulagaina fuafuaga uma e faaaogāina ai le gagana Samoa.
O tala faasamoa, o siva, o pese ma tautalaga e oo lava foi i laei ma taumafa, ua tapenaina lava ina ia faamautu, ma saga faamamafa ai pea le tāua o le vaiaso o le gagana Samoa i totonu o Niu Sila.
