“Tauaso le Alofa” ata tifaga fou a le South Seas Pictures Ltd

Ua talafeagai lava le faamanatuina o le vaiaso o le Gagana Samoa i totonu o Niu Sila nei, ma le faalauiloa mai o le ata tifaga fou a le South Seas Pictures Ltd, ua faaigoaina o le Tauaso le Alofa poo le Love is Blind.

O lenei ata tifaga fou o le uluai ata tifaga lea ua pueina atoa lava i totonu o Amerika Samoa. O tagata uma foi o loo faatinoina lenei ata tifaga o tagata uma lava o Amerika Samoa.

O le ata fou lenei e lua itula 15 minute lona umi, ma o le ata tifaga aupito i umi lea ua pueina e le South Seas Pictures. O le ata lenei na tusia e le tofa ia Tanupo Fiu Fogalevai Aukuso, o ia foi sa pueina ma tuufaatasia lenei ata atoa.

O le vaiaso na tea nei na tatala aloaia ai i totonu o Amerika Samoa le ata tifaga fou, ma ua iai foi le faamoemoe o le a faaali lenei ata i le faletifaga o le Apollo i Samoa i taimi o aso fiafia o le faamanatuina o le 50 tausaga o Samoa.

Na ta‘ua e le tofa ia Tanupo, lona agaga fiafia i le maualuga na oo i ai le faatinoga o lenei ata tifaga e tagata o Amerika Samoa. O le ata fou o loo faaautu lea i le tamaitai talavou o Olive faatinoina e Christina Sosaia mai le afioga o Nuuuli ma Tuanai, ma le alii faifaatoaga e suafa ia Lemi o loo faatinoina e Tumua Falefata le afioga o Faleniu ma Saleapaga.

O lenei ata o loo molimoli mai ai itu ma‘ale‘ale o le alofa faavalea.

O se ata e te ata nee ai, ae e te toe tagi masusu ai foi. Na ta‘ua e le tofa ia Tanupo o le fitu a‘i lenei o ata tifaga ua pueina e le South Seas Pictures, ma ua iai foi lona talitonuga o se ata o le a faamalieina ai le maimoaga a le atunuu.

O le ata tifaga lenei o le a faia lona faaaliga faapitoa i le UNITEC i le Aso 31 o Me, o se vaega o polokalame a le UNITEC e faatāuaina ai le vaiaso faapitoa o le gagana Samoa.

Ua faatauina nei i tua lenei ata tifaga fou mai le Samoa Video Center i Otahuhu faapea le faleoloa o Taliaoa le RSL i Henderson, o le faleaiga o Evelina i Clendon ma le Aunty Ella i Magele.