Tatala le tusi fou ‘Matiaki learns about Road Safety’
O se tusi ua fuafuaina faapitoa mo fanau Pasefika, ina ia mafai ona malamalama lelei i tulafono i luga o le alatetele, mo le tausia o le saogalemu.
E ono gagana ua lomia ai lenei tusi, e aofia ai le gagana a le Atu Kuki, Samoa, Tonga, Niue, Tokelau, ma le faaperetania.
O le Aso Lulu o le vaiaso nei, aso 14 o Novema, i le nofoaga o le Aoga Amata a le Mataliki Tokelau Akoga Kamata i le tuatusi, 53 Ragan Street i Magele i Sasa‘e, mai le 10 i le taeao i le 2 i le aoauli, o le a faatino ai le tatalaina aloaia o lea tusi.
O loo tuuina atu le valaaulia i soo se tasi e avanoa aemaise lava foi mātua ina ia auai i lenei aso tāua, mo le molimauina o lenei fesoasoani tele auā lava le tausisia o le saogalemu i luga o auala, o se taulogologo lelei mo le saogalemu o fanau ma tagata uma lava.
E iai foi nisi mea mananaia o le a faatino i lea aso, e pei o le valiina o foliga, (face painting), puppet shows, le faitauina o tusi (book readings), road safety stations ma isi faatinoga tāua e taulai lava i le auga e tasi, le tausisia o le saogalemu i luga o ala tetele.
