O le fuafuaga a le Malo mo se Komisi e unaia le Soifua Maloloina – o le a fofogaina ai le atunuu i se taimi o i luma, ae o se fuafuaga ua faaalia e le Vaega Faaupufai a le Tautua Samoa, o le a aveese ai le tele o galuega o loo faatino e le Matagaluega.
Faaalia e le Afioga Levaopolo Talatonu le sui o le Tautua Samoa, o ia foi o le alii faipule o le Itumalo Faaalalafaga o Gagaemauga Numera Lua (2) – o lea fuafuaga o le a leai ai loa se galuega e toe faatautaia e le tamaitai Ofisa Sili, le Pulega ma le Aufaigaluega a le Matagaluega a le Soifua Maloloina.
“O ā la galuega o le a faapea ona faatinoina e le matagaluega o le soifua maloloina pe afai e toe pau lava lea o le latou matafaioi tausi na o le soifua maloloina mo le mamalu lautele o le atunuu?”
Ua mae‘a ona vaelua le Matagaluega lenei e pei ona iai le Auaunaga faafomai ma tausi soifua (National Health Services) ma le Matagaluega o le Soifua Maloloina lea ua patino lava i ai le faatinoga o faalauiloa o le soifua maloloina aemaise o le faamautu o faiga faavae, o fuafuaga faataatitia ma tulafono o le faatingoa o galuega tau i le soifua maloloina.
O le auaunaga a le NHS lea ua faauluulu i ai Leota Laki, o le faatinoga lea o le auaunaga e pei ona iai falemai o le auaunaga faafomai ma le auaunaga faatausi soifua.
O lea la ua iai le fuafuaga foi lenei i se Komisi e faatamoe galuega faalauiloa ma le unaia o le soifua manuia lautele i soo se itu o le atunuu.
O loo iai foi le fuafuaga ina ia ave lenei komisi i se faalapotopotoga tuma‘oti e tai foliga mai e faakonekarate le faatautaiga o a latou galuega. O tupe faaopoopo ia o le a faaalu e le Malo e faavae ai se Komisi ma faatamoe ai a latou galuega fai ma ua faamamafa ai e le Tautua Samoa le talafeagai o lea ituaiga tautua ae o le galuega tonu lava lea o loo ua ave i le Matagaluega o le Soifua Maloloina i le taimi lenei.
O le itu muamua ua lu‘i ai e le alii faipule le Malo, ina ia tagai poo faaititia le fainumera o tagata e maua i le faama’i tumau o le suka ma le toto maualuga, poo faama‘i e pei o le ma‘i fatu, kanesa ona e mafua mai i le lē lava o le malamalamaaga o tagata i aafiaga ma itu e mafua mai ai nei faama‘i le pipisi tumau.
O le itu lona lua, o le mafai lea e le malo ona faia se vaega suesue o le matagaluega e faia faamaumauga poo aoga faamalosi tino ma polokalame faalauiloa a le Matagaluega o le Soifua Maloloina i le faaitiitia lea o gasegase ogaoga, lea e tele tupe alu a le malo e faaalu ai i tausaga uma mo togafitiga i atunuu mamao.
“E lē laitiiti tupe e tilotilo i ai le malo mo togafitiga o nei gasegase i atunuu mamao, ae o le fesili, o ai e tuua‘ia?” o lana saunoaga lea.
O le finau mai a Levaopolo, e aogā ona faaaogā ia tupe maua mo le faalauiloaina o le soifua maloloina, lea e oo atu i le $50 miliona ina ia totogi ai le tele o falemai tuma‘oti e mafai e le atunuu ona saili togafiti ai ona e lē o taitai ona lava le tautua o loo ofoina atu e le Falemai Tele i Motootua mo le atunuu i togafitiga.
“E aogā lea e mafai ai ona gafatia e le atunuu le oo atu i se fomai tuma‘oti e saili togafiti ai, ae lē o le toe faatūina foi o lea Komisi ua fuafua e le Malo ae leai lava se mea o tino mai,” o le saunoaga lea a Levaopolo.
“O le isi itu o le faatupeina o vai ma fualaau e faaaogā e nai tagata o loo maua i nei gasegase ogaoga auā o le tele o tagata e lē o mafai ona gafatia ni talavai e tuuina atu e fomai auā togafitiga.”
Ae i se tali mai a le Ofisa Sili o le Matagaluega o le Soifua Maloloina, Palanitina Tupuimatagi Toelupe sa ia saunoa manino ai o le finagalo lava o Levaopolo o lona lava lena talitonuga. Sa ia ta‘ua, o se Vaega Faavae lea ua fuafua le Malo e faatūina, e patino lava i ai le unaia o faalauiloa e tele ma anoanoai auā lava se soifua maloloina lelei mo le mamalu lautele o le atunuu.
O nei fuafuaga sa saunoa Palanitina e lei faato‘ā faia e le Malo, ua leva ona fuafuaina mai i le tausaga e 2006 i le mae‘a ona tuueseeseina le NHS ma le Matagaluega o le Soifua Maloloina i le tausaga e 1998.
“O nei fuafuaga ina ia mautinoa e ese le matafaioi a le Vaega lea o le a nafa ma le unaia o le soifua maloloina ae mataituina e le matagaluega le soifua maloloina lelei mo le mamalu lautele o le atunuu,” o lana saunoaga lea. Sa ia tautino ai le faatuputeleina o le fainumera o tagata e aafia i le faama‘i o le suka ma le toto maualuga ma ua faamauina foi o le toatele o tagata e maliliu i tausaga taitasi e mafua mai i faama‘i nei.
“E faigata ma e lē o se galuega faigofie, o lea tatou te tilotilo i le isi 30 tausaga e tau liliu ai vaega ua masani ai le atunuu, i le fiafia i mea taumafa mai fafo tuu‘aisa lea ua maua i suesuega e fesoasoani tele e faatupulaia faama‘i tumau nei,” o le saunoaga lea a Palanitina.
I se tasi o saunoaga a Palanitina ua ia faaalia ai ua tele ni faatalatalanoaga e faia e uiga i lenei fuafuaga a le malo ma e toe pau le tulaga o loo faatalia o le faataatia o se tulafono auā lea fuafuaga aoga mo le lumanai manuia o tagata o le atunuu.
“O le tatou matagaluega o le matagaluega o le soifua maloloina, ae lē o se matagaluega mo faama‘i e fia tineia e le soifua maloloina,” o le saunoaga lea a Palanitina.
“E mafua ona faatupulaia le fainumera o tagata e aafia i lenei faama‘i, ona e lē o lava le seleni e faatino ai e le malo le tele o matafaioi alualu mamao auā le unaia o le faaitiitia o nei faama‘i ogaoga, ma e pau lava le matafaioi a le matagaluega o le taumafai e faailoa i tagata e lelei lava meaai Samoa e tausi ai le soifua maloloina,” o lana saunoaga lea.
Na ia faailoa o lea fuafuaga o se vaega o fuafuaga ua leva ona faataatia e le Malo i le talitonuga e matuai aoga ma lelei ai le soifua maloloina o le mamalu lautele o le atunuu pe afai e tuumatāmaga tiutefai mo vaega.
