Ua lagona le leo o le faatama poo le patron o le faalapotopotoga o le Toomaga o Tagata Puapuagatia, le afioga i le Minisita o Galuega, Tuisugaletaua Sofara Aveau, ua tatalo ai i le atunuu e avatu le lagolago i se polokalame ua fuafua le faalapotopotoga e faasavali i nuu ma afioaga o le a afea ai foi ma ekalesia, mo le tafiesea ma faaitiitia ai solitulafono o le faiaiga faamalosi poo le rape, ua aafia ai le toatele o alo tamaitai o le atunuu. “O le naunautaiga o le faalapotopotoga ia mafai ona faia so latou sao i lenei agasala ua faatupulaia, e pei ona iai popolega ma atugaluga o le faamasinoga”, o le finagalo lea o Tuisugaletaua Sofara.
O le faailogaina o le Aso o Tama poo le Farthers’ Day i le masina o Aukuso o loo faamoemoe le faalapotopotoga e faalauiloa aloaia ai le polokalame. O le mafuaaga e pei ona saunoa le Ofisa sili o le faalapotopotoga le susuga Viliamu Paese, ona o le a avea ai le itupa o tamā ma amataga taua i le fia maua o se vaifofo i le faatuputupulaia o solitulafono tau faigaaiga faamalosi ua aafia ai tamaitai aemaise lava o fanau teine i le va ma o latou tamā, tuagane, poo tausoga ma isi tagata o aiga. “O le manatu atoa o le tauaveina o le polokalame, o le unaia i se auala e mafai ona puipuia ma faaitiitia ai nei ituaiga o solitulafono. Ona o lea ua maua faamaumauga talu ai nei ma se finagalo o le faamasinoga ua manatu ai le tatou faalapotopotoga e faia se galuega fesoasoani”, na saunoa ai le faatama.
E le o mafai ona tuuina mai e le Toomaga o Tagata Puapuagatia ni fuainumera o solitulafono tau faamalosi teine ua oo i le faamasinoga, ae na faaalia e le susuga Viliamu Paese o loo faatupulaia pea e fua i faamaumuaga a le Matagaluega o Faamasinoga. O le taimi nei e toa 15 tamaitai talavou ua aafia i nei faiga solitulafono o loo malu puipuia nei i le vaaiga a le Toomaga o Tagata Puapuagatia. Na saunoa Viliamu e toatele tamaitai ua aafia ma fia ofo i ai le galuega tau puipuiga peitai e le o lava le nofoaga na tuuina atu e le Malo e faamautu i ai. O le avea o le faalapotopotoga ma amatamea i taumafaiga e faaitiitia ma tafiesea le toso teine, ua talitonuina ai le ave o le lagolago a nisi o taitai o le Malo i le polokalame. Ua faaalia foi le tuuina atu o le lagolago a nisi o taitai o ekalesia e pei o le afioga i le Aki Epikopo le faauluuluga o le ekalesia Katoliko, Alapati Mata‘eliga.
O loo naunau le Toomaga o Tagata Puapuagatia o le a iai ma nisi e tuuina atu le latou lagolagosua mo le faatinoina o le polokalame lea o le a faatino i totonu o le 6 masina e amata ia Aukuso ae maea i le masina o Fepuari o le tausaga fou 2010. Ua fesoasoani malosi le faalapotopotoga i ni auala e sailia ai le faamasinoga tonu i nisi o mataupu tau toso teine e tuai ona suesueina e le Matagaluega o Leoleo ma Falepuipui. O le tasi lea o auaunaga ua matua ave ai le faafetai a nisi i le Toomaga o Tagata Puapuagatia, pe ana le seanoa i latou e le mafai ona taunuu a latou faasea ma tagi i le faamasinoga mo le suesueina ma faia faaiuga ia i latou e faatinoina lea solitulafono.
