E ui ua faatau e faipisinsi Saina siea “shares” ale Aggies Sheraton i Apia, peitai e le o iai lava ma ni suiga ile Pulega ma le faafoeina ele Sheraton e oo lava ile igoa e tumau pea le Aggies.
Ile talanoaga ma le sui ole Pulega o Sheraton i Apia, Mark Francis “o Aokuso ole tausaga nei lea na faatau ese ai siea ale faletalimalo. Peitai e faaauau lava le konekarate 20 tausaga ale Sheraton ile faafoeina ole pisinisi.” O lea faatoa 19 tausaga o lea feagaiga, ma e leai lava se suiga o tupu ile laina ole pulega poo nisi tulaga e ese mai ai.
Ua amata ona lelei mai le tulaga tau ile pisinisi, e ui ina ua faaopoopo isi potu ile faletalimalo fou ole Taumeasina, lea ua silia ma le 300 avanoa mo tagata asiasi mai ile maketi i Samoa, ae oloo galulue lava faatatau i suiga ole itu tau pisinisi.
“Ua galulue malosi ai nei le itupa lenei tau i faletalimalo faatatau ile taimi pisi foi o femalagaa’iga a vaalele ile masina fou, lea ole a faasolo atu ai ina tele mai malaga a vaalele.
Ae ose tulaga lelei e faamalieina ai isi malaga faaopoopo, e le gata ole vaalele a Ausetalia, ae o Niu Sila ma Fiti.
Peitai ole tulaga o tulimataia nei, ole faapefea lea ona aumaia tagata i Samoa, i taimi e masani ona maulalo ai le fuainumera o tagata femalagaa’i, e pei ole sau ia Tesema ia Mati. Ae o isi maketi na talanoa ai le alii pule, oni malaga e maua mai Saina ma Amerika i Matu.
Faafetaia le malo ile vaevae o api mo fonotaga e faia mai i Samoa
O isi laasaga sili ona faafetaia ai ele pulega o iai nei ale Sheraton le malo, ona o ana fono lea oloo faia mai i Samoa ma manuia ai faletalimalo, i usufono. Ua molimauina le fai taimi lava o lea fono i lea faletalimalo, e fesoasoani tele lava lea e le gata o tupe maua a faletalimalo, ae ose tulaga maualuga tele lea mo le faalauiloaina o Samoa. Ua maualuga foi le lagolago ale Sheraton ile galuega ale alii Palemia o faia nei, ole avea lea o Samoa, ose nofoaga e faia mai iai fonotaga tetele. Auā oloo iai le talitonuga, o tagata nei e malaga mai fono, e latou te folafola mai lava, le toe foi mai i Samoa mo se malaga tafafao, ma aumai o latou aiga. Ose tasi lena o faamanuiaga, e fiafia ai tagata uma.
Tumau le galulue faatasi ole Sheraton ma faifaatoaga i Samoa
Mai le silia ile 200 tagata faigaluega ale Sheraton Aggies hotel i Samoa pe ā ma le 190 oi latou nei o tagata Samoa, ae ole isi vaega e aofia ai ma le pulega o tagata e iai tomai faapitoa mai fafo. Ole pule ose alii Kanata Niu Sila. Oloo faatau lava le tele o taumafa i Samoa, o fualaau e pei ona sa masani mai ai.
E taufaamata’u lava lologa ile faletalimalo
E le o iai se fefe ise vailoloa e pei ona sa iai aafiga muamua ole faletalimalo, peitai ile talanoa ale alii pule, e iai lava le mata’u ise isi itu. Ae a vaai atu foi ile laasaga o galuega faaleleia ua mae’a ona faia mo le vaitafe, e pei ona poloka ese atu ai le tafe mai, ma fau faamausali alavai, ua sefe ai lava le faletalimalo.
O tafega talu ai nei, na latou mata’ituina lava le tafe ale vai, na vaaia lava le maualuga ole vai, ae ua mausali auvai tali tafega, ole pa maualuga e puipui mai ai. Ua iai foi ma le pamuvai i lalo ua fausia faapitoa lava mo mea tutupu, talu ai le maualuga pea ole sami nai lo le vaega i tua ole faletalimalo.
Tapena foi le Sheraton mo taimi leaga ole tau
E le o tuumāmāina ele pulega o iai nei, tapenaga mo le saogalemu o tulisi ae o malo asiasi mai ma nonofo ile Sheraton Aggies.
Ile tala ale alii pule, ua malosi le faletalimalo tele i luga, e nonofo ai tagata i taimi e faaletonu ai le tau, ma ua nofouta foi ile lipoti nai ai le loloto ole suavai ile taimi o lologa talu ai, e lei oo ane le vai i sitepu pito i tua ole faletele.
Aloaia ma amanaia e Saina talafaasolopito ole Aggies Hotel
E filemu lava suiga siea ole faletalimalo mai ia Aggies i faipisinisi Saina, peitai ua maitauina le tumau lea ole aloaia ma le amanaia pea o tala faasolopito ole faletalimalo o Aggies, e le gata ole aiga e ana, ae o Samoa foi. Ua tele tausaga o lenei pine faamau i Samoa, ma oloo silafia lelei lava e tagata ua latou faatauina talu mai Aokuso 18, 2017.
Fiafia lava Sheraton ile faaauau ai pea ole pisinisi
“Oloo fiafia lava Sheraton, ile faaauau o iai nei, ma le tumau ai i Samoa, ae ole suiga ua iai, e le taumate ole a maua ai se tali ile fesili, ole faapefea ona aumaia tagata ile tatou itulagi i taimi e faaleai ai ni tagata, ia Tesema ia Mati.
Ose fiafiaga lea pe afai ole a mafai ona maua ai se faatauvaga i malaga a vaalele, ole a lautele atu ai le maketi, e faaaogā iai a latou auaunaga, i tafaoga, ae o faleaiga ma faatauga, ae ole itu tāua ole faatumu lea ole avanoa, auā oloo afaina faletalimalo ma isi pisinisi ile atunuu.
Auā afai ae faatauva mai kamupani vaalele i Samoa, i Niu Sila, Ausetalia ma Fiti, ole taugofie foi lena mo tagata tafafao mai ma taugofie ai lava pasese o vaalele.
E lei maua se faatalanoaga mai le pulega ole Aggies Hotel, ae ua atagia i luga o faamaumauga ale MCIL Matagaluega o Pisinisi ma Alamanuia.
