O mitamitaga lava o mātua uma ia savavali le fanau i ala o le amiotonu. O le Aso Toonai 20 o Aperila na faataunuuina ai le faamoemoe o Jane mai le afioaga o Sapapaalii ma Brett Faavae mai Salelologa, i le sakalameta o le faaipoipoga, i le maota o le ekalesia Uniting Church i Melepone, Ausetalia.
O se sauniga matagofie lona faatinoina i le taitaiga a le faifeau papalagi o le ekalesia ma o viiga foi o le sauniga na feagai lea ma le aufaipese Samoa a nai o tatou tagata Samoa o loo lolotu ai lava i lea falesa.
Na mae‘a le sauniga ona tuumuli loa lea i le maota e fai ai le taumafataga, ma o iina na feiloai ai ma le tele o le auvalaaulia faapea ma aiga o itu e lua.
O mātua o le tamaitai faaipoipo o Salima Fatu Salima (Sapapaalii) ma le tausi faapea foi ma mātua o le tama faaipoipo o Fonoia Mila Alesana ma le tausi ia Malu Alesana o Salelologa.
E alaala mātua o le teine i Melepone ae malaga mai lava i Samoa mātua o le tama mo le faamoemoe o le fanau.
E mālie eseese foi nota o le faaipoipoga i le mea na uluai feiloai ai le tama ma le teine faaipoipo. Na saunoa le tama faaipoipo i le taimi o le taumafataga, o le upega o fesootaiga na la feiloai ai i luga o le Facebook ma lana manamea, ae na ia malaga i Melepone e fia feiloai ai, ae lei vaai lava le isi i le tasi, vaganā ata feaveai i le upega o fesootaiga. Tusa lava pe lei fevaaia‘i ae na mafai lava ona la feiloai lelei i le malaevaalele e pei ona sa faatalitali mai ai lana manamea o Jane mo ia.
Lelei foi nei ituaiga uo e maua lava i luga o le upega o fesootaiga (Facebook), e leai se tigaina e tau savali e saili e maua lava i luga o ala faaonaponei faatekonolosi e pei ona molimauina e le toatele o tupulaga i nei aso. Pau le mea e talosia ia tumau le aiga fou i le fealofani ma le mafuta fiafia ma ia fua foi faatatau le niu, ona o nei aso o le tulaga vaivai o le tupe mo le tausiga o le fanau.
O le susuga i le faifeau ia Tanielu Atioo na saunia le tatalo faaiu ina ua mae‘a le fetalaiga matagofie na fetalai i ai le fetalaiga ia Salima Salima (grandfather o le teine faaipoipo) e faafetaia le auvalaaulia ma le ekalesia e tusa o meaalofa ma le faaavanoaina o le taimi e faatasi mai ai ua matagofie ma maualuga ai le aso fiafia o le fanau.
Na faapea foi ona fetalai se sui o le ekalesia e faafetaia aiga na lua e tusa o le taumafataga matagofie na saunia mo le auvalaaulia.
O loo malaga atu nei le ulugalii fou i Samoa e faataunuu ai la laua tafaoga (honeymoon) ma toe taliu mai ai i Melepone e faamautu i ai le aiga fou. Ia manuia tele Jane ma
Brett lo lua aiga ma ia faavae i le alofa mai le Atua.
