Na matagofie le susulu o le la na momoli maia le mafanafana i le Aso Toonai na tuanai atu nei, a o tapisa ma alalaga fiafia aiga na lua i pesega o le olioli ma le faamanū, ona o le aso ua leva ona loma ma tuu atu i talosaga ina ia tusia faatasi ai igoa o Fay ma Daniel i pepa o faamaumauga o le tane ma le ava faaipoipo.
E lei mafaatusalia le mafanafana o ave o le lā, i le alofa mafanafana na molimauina i le malumalusa o le Ekalesia o le Aupaia o Aso e Gata ai i le aai o Melepone, na feofoofoa‘i ai a la tautoga, faamaulu a la mama, ma faalaeiina i laua i faamanuiaga na faaee atu e sui vaaia o le Atua, susuga i faafeagaiga taulagi.
Na mae‘a le sauniga sosoo ai ma le taumafataga i le Stake Centre i Deer Park, na aofia potopoto ai le paia o Samoa na valaaulia, susū foi le taitai o le Stake le susuga i le faafeagaiga ia Kalolo Manua, faapea susuga i Epikopo ma o latou faletua, aemaise o le mamalu o le Ekalesia.
O le susuga ia Spencer Tito na fai ma Fofoga o le aso, lea na faafeiloai i le aofia ma faagasolo ai le polokalame.
Na logo faa-Tutuila le aofia i molimau matagofie o soifua o le ulugalii fou mai nai o la mātua, o le susuga ia Tavita Taupau na fai ma o la sui ma le faletua ia Tolopo e molimoli le molimau mo si o la alo le tamaitai faaipoipo o Fay.
O le tina ia Tavalea Nonu na fai ma o la sui ma le susuga ia Pofitu e fofogaina le molimau mo le faatoafaiava, ona alo loa lea i le taumafataga matagofie ma le felanulanuai na maau i ai aiga na lua. Na faagasolo faafiafiaga a ausiva mai Aotearoa, le aai o Sini faapea ma Melepone lava, ma faamae‘a ai le aso i le saunoaga faamanuia a le sui peresitene o le Stake le susuga ia Davit, ma ta‘ape ai le fili alii ma le mama ua lomi ma le faamanū sii i le Tapaau ona o le aso ua ula, ma manuia.
Faamanuia le Atua i le ulugalii fou, Daniel ma Fay Nonu.
