E lē o mafai ele Koluse Mumu ona faatino ana manaoga faavavave e faaaogā iai le siaki $50afe tala Amerika mai ia Saina. Talutalu ai e lē o mafai ona tala vagana ua kilia mai ele faletupe.
O Saina lava na uluai taunuu le latou mealofa ile Koluse Mumu i Tuanaimato, ile uma ane ai ole afā o Gita. Peitai e oo mai ile taimi na tapena ai le tatou tala lenei, Aso Gafua 19 Fepuari, 4pm e lei mafai lava ona kiliaina ele faletupe le siaki.
“Seiloga e lima ile fitu aso e faatali ai, faatoa mafai ona faamatuu mai se seleni.” Na talanoa ai le tamaitai failautusi aoao ale Koluse Mumu o Samoa, Namulauulu Tautala.
“Ua tatau ona faaauau galuega, mo nai aiga oloo manaomia ai tele se fesoasoani ile taimi nei, aemaise lava o aiga na faaleaga fale ae ua leai se suavai. Aemaise lava i vaega na lofia I tafega ma lologa. O isi nuu e lē o iloa tele atu aafiaga i totonu, e iai Malie ma Afega, na leaga foi fale o aiga. Ole tele o aiga ua oo ane lava ile ofisa ole Koluse Mumu i Tuanaimato, ma o atu iai asiasiga, e faasa’oa ai.”
“E foliga mai ua mafuli i isi nuu le vaai ale malo, ma fale pa’ūū”
Molimau le Koluse Mumu, “o le tulaga ua oo iai le matou vaega, e faafetaia ai le omai o tagata, mo fesoasoani, e iloa atu ai faaletonu, e lē o mafai ona oo iai asiasiga. Aemaise o totonu i vaega i uta o nuu, aua o isi asiasiga e o atu ile auala ae lē o oo i tua. Talanoa le failautusi, “Ua tele ina tumutumu le matou ofisa i tagata omai, Ae mole mamalu ole atunuu e valaau mai ile Koluse Mumu, e faamaumau ma alu iai le asiasiga, ma vaai pe moni lipoti na aumai ile telefoni.”
Tele o tagata fai mai e mananao i tapoleni, ae oatu e leai
Ile faamaninoga a Namulauulu “Na’o aiga lava o nonofo i mea lē tumau e mafai ona ave iai tapoleni ele Koluse Mumu: “E iai lava nuu e lei ola paipa, ae oloo fai feutanaiga ma nuu na faamatuu iai tane vai i tausaga ua tuanai ele Koluse Mumu. O tane na e faaleoleo mo taimi oge ole vai, tau ina faatali ai, le taimi e maua ai suavai mautu i vaitau faapenei.”
Ile lipoti tuufofoga mai ale Koluse Mumu, o nuu na oo atu iai asiasiga ma molimauina faaletonu, e aofia ai, Faleapuna, Solosolo, Tiavea Samusu, Saleaumua, Palisi, Susega, Falealupo ma isi.
“O tane vai ua uma na tuu iai a’o lei oo mai taimi loulua ole tau, ole faamoemoe mo tagata o afioaga mo taimi faapenei e tulai mai ai faaletonu ma pepe paipa. O loo taumafai e faatalanoa i aiga, e faasoa le suavai, ae oloo tilotilo foi le pulega i tagata o faia pe gaosia tane vai.”
“Ua uma ona matou talanoa ma le LDS, Ekalesia Mamona e toe faataatia se ata o matou tane vai ma amata ai ona ave tane i tua, ia silafia uma e aiga, ae lē o maua se suavai, e mafai ona faasoa le suavai mai tane na.”
“Ole la ua taumafai le au fai tane vai, ia lelei foi le latou matafaioi infrastructure, mo le toomaga iai ole atunuu. Ole tele lena ole galuega o faia nei, ole auga, aua ne’i iai se faamai e aafia ai le atunuu ona ole leaga o vai taumafa.”
“Ae o vai to’a mai le dengue fiva, o iai foi tainamu o tufa i aiga na to’a ai le vai, e momoe ai nei faatetele le pisi ole dengue fiva. Ua tele le malamalama ma le iloa i mea e tatau ona tapena ile tupu soo o nei faalavelave, e tali atu ai i manaoga o tatou tagata.”
“Ae ole toe asiasi atu i aiga, ona oloo faitio mai lava ile tuai atu, ae ua na’o le faamalie, ona e tele mea e o iai le Koluse Mumu ole mea lea ua iai nei, seiloga e oo ile afiafi, aua ua tele volunteers ua toe foi e faigaluega. E le mafai lava ona maua uma sapalai manaomia seiloga e tala mai le tupe a Saina.”
“Lenei lava e lei maua seleni (mai Saina) faimai le bank seiloga e faamalieina le latou system poo galuega faasolo masani ai a faletupe. Sa matou feutanai ma le sui ole malo o Niu Sila i Samoa, ma na latou fesiligia foi, matou i mea manaomia, ae ua ta’u atu iai ole vai lava. E tele lava mea e filifili mai ai, pei o masini faamama suavai, oloo teu lava talu mai le afā o Eveni e lei faaaogāina ile taimi nei, e mafai ona faaaogā masini e tolu o iai.”
“Ole masini e 5afe lita ole vai e mafai ona faamamā ai i totonu ole itula, ae o isi masini e lua, e ta’i lua afe lita ile itula. Na matou fai ia Niu Sila e matou te manaomia ni mobile Generators poo afi faaleoleo e mafai ona faaaogā ai masini ia, pe afai ole tali lena ise taimi oi luma ile faaletonu o suavai.”
“Ile taimi o Eveni, i Vaiee sa faia ai foi lena fesoaosani, na’o le faamama lava o tane ma o atu itumalo, e ki vai mai tane na faamama i lena taimi. Afai ae vasa’i mai le timu, e ono aogā ai masini nei.”
O upu mulimuli a Namulauulu, ile atunuu, ina ia, “Onosai oloo taumafai e tali uma manao i mea oloo manao mai ai, aemaise oloo talitali se taimi e matala mai ai le mealofa tupe a Saina lea e poloka mai ile faletupe.”
