Leva ona valoia ele Labour le tapunia o aoga ua fai faapisinisi

Ua iai aoga ua faaoo iai le avea’i ale faigamalo ale Labour ua tatau ona tapunia, o aoga ia ua iai le talitonuga ale malo ua fai faapisinisi (Charter School) e aofia ai le aogā oloo i Magele faapea aoga a Maori ma le aoga oloo i Otahuhu oloo taitaia e nisi o alo ma tamafanau ole atunuu le Pacific Advance Secondary School.

E foliga mai, e lē ose mea fou lea tulaga e pei ona saunoa le afioga ile Minisita ia Aupito Su’a William Sio, o aoga nei sa faavaeina mai ile vataimi a’o tulai mai le faigamalo ale National Party ma le Act. Ole talitonuga la ale faigamalo oloo tulai mai ile taimi nei, ole iai o aoga nei, e foliga mai ole taumafai lea e talepe le faatāuaina o aoga ale malo.

A’o lei faatinoina le faigapalota tele ale malo e pei ona iai, ua leva lava ona tuuina atu le aveai ale Labour ile malo sa iai i lea vaitaimi e lē mafai ona latou lagolagoina aoga ua fai faapisinisi, ma oloo lagolagoina foi ele New Zealand First ma le Green Party. O aoga foi nei ua fai faapisinisi, e lē mafai ona tuuina atu iai ni tupe ale malo e faatinoina ai galuega, ae tatau ona o lava latou e sue ni a latou tupe, auā a ave iai tupe ale malo e faagaioi ai galuega o lona uiga ua penefiti ai latou.

Ae afai ae silasila le malo i aoga nei, i vaega uma oloo faatinoina ai galuega oloo lelei atoatoa, e pei la o faiaoga, e tatau ona maua lelei faailoga ile tomai ma atamai e tatau ona iai faiaoga ile a’oa’oina o tamaiti, aemaise ole naunau pea o latou e tumau i lalo ole polokalame o aoga, o lona uiga o aoga la ia ole a faaofi i lalo o polokalame ale malo.

Tusa ai ma faavae o aoga oloo iai ale malo, ua ta’ua o Special Charter School o lona uiga o aoga oloo iai so latou tāua faapitoa e ese mai i aoga ale malo. O aoga foi ia oloo latou faatāuaina le gagana, aganuu ma oloo a’oa’oina e faiaoga ua pasia o latou tusi faiaoga. O aoga la ia e mafai ona faaauauina, ae faaauau i lalo ole vaaiga ale malo.

E lē taofia ele malo pe afai e mananao lava le aoga latou e faaauauina lava a latou aoaoga, ae pau le tulaga e oo iai, e lē mafai ona tuuina atu iai se fesoasoani ale malo mo aoga ia, o aoga tutoatasi oloo lesitala faapisinisi. Ole vaiaso nei ua amata ai feutagaina ale malo ma aoga taitasi nei.

Saunoa le afioga ia Laauli Michael Jones oloo faauluulu iai le aoga ale Pacific Advance Secondary School i Otahuhu, oloo faatali feutaga’ina ale aoga ma le malo, ma oloo taulai lona talitonuga e leai se mea tele e suia ile aoga. Oloo ia lagona foi oloo sologa lelei mea uma ile faatinoina o galuega.

E iai le faamoemoe o mea ole a feutagai ai le malo ma le aoga, ole a mafai ona toe logoina ai le komuniti ile tulaga o lea oo iai. O lona agaga faafetai ile tapuaiga ale atunuu ona ole lagolagoina ole aoga. Talosia ole lumanai ole aoga ose lumanai manuia mo alo ma fanau o tagata Pasefika.

Oloo tumau pea lona faatuatua ma lona talitonu ile Atua e aumai ai le sa’o o mea uma e faatinoina ai le galuega auā le lumanai manuia o fanau. Talu ai o tulaga lava faapolokiki oloo mafua ai nei tulaga uma ae o tupulaga talavou ole lumanai manuia lea o aiga ma nuu ma ekalesia.

Ole ā lava le tulaga ole a oo iai se feiloaiga ale malo ma le aoga, ae iai lona talitonuga ole nofoaga lelei lea mo le lumanai manuia o fanau lalovaoa, ole Pacific Advance Secondary School. Ole faamalosi ale afioga ia Laauli Michael Jones ile komuniti, aemaise o mātua ma aiga oloo iai o latou alo ma fanau ile Pacific Advance Secondary School, ia tumau pea ile faatuatua ma le talitonu ile Atua e aumai ai le tali o mea uma.