Ua faatali nei le faamasinoga faaitumalo pe o le ā se faaiuga a le Komesina o leoleo ma falepuipui i le talosaga e toe faaui mai i tua le moliaga e tasi, o le faia o se gaioiga solitulafono na saini faamalosi ai ni suafa o ni tagata i se nonogatupe.
O le moliaga lea ua ta‘ua i le gagana peretania o le forgery, o loo molia ai lē sa avea ma Peresitene o le Faalapotopotoga o le au faipisinisi i Samoa, le Chamber of Commerce, le afioga i le faletua o Lemalu Sina Retzlaff Lima.
O lana tautoga poo lona toalua le afioga Muliagatele Brian Lima, na ia faaulu se tagi i leoleo na mafua ai ona faia le moliaga e tasi faasaga i lona faletua. Faaalia e le sui sooupu o le Matagaluega o leoleo, le afioga Leaupepe Fatu Pula, o le tagi a Muliagatele Brian sa suesueina e le vaega suesue o le matagaluega o leoleo le CID poo le Criminal Investigation department. “O se nonogatupe e faapea na faia i se faletupe, na saini faamalosi ai e lē o loo molia le suafa o lona toalua ma le suafa o le tamā o lona toalua e aunoa ma le silafia e i laua” (Brian ma lona tamā le afioga Tuliaupupu Pala Lima).
O le Aso Lua, 13 o Tesema 2011 na valaau ai mo le taimi muamua le moliaga o Lemalu Sina lea sa tulai ai le tamaitai loia o Tima Leavai mo lē ua molia, ae o le itu a leoleo sa tulai mo le itu tagi. Na faailoa ai e le itu e leoleo le faato‘ā taulimaina i le taeao o le aso lava lea o se tusi mai lē e ana le tagi, ua tatalo atu ai e toe faaui i tua le moliaga.
Na talosaga le itu a leoleo i le faamasinoga mo se isi aso e tolopo i ai le mataupu e aunoa ma se tali a lē ua molia, se‘i tuuina atu le talosaga i le Komesina o leoleo mo se faaiuga, ona ua na o le komesina e iai le pule toatasi e maua ai se tali o le talosaga i le faaui i tua poo le faaauau pea. Na faaalia e se molimau o nisi o le aiga o lē ua molia ma tuua‘ia, na faia se ifoga ma se faatoesega i le aiga o le itu tagi a o lei fofogaina le moliaga i le faamasinoga.
O le faatoesega lea na mafua ai ona faia le talosaga e toe aumai i tua le mataupu e pei ona faaalia e le molimau. O le Aso Tofi o le vaiaso nei, 22 o Tesema 2011 o le a toe fofogaina ai le moliaga o Lemalu Sina lea o le a tuuina atu se faaiuga a le komesina i le talosaga a le itu tagi. O se tasi o faletupe i le atunuu na faia ai le nonogatupe ua mafua ai lenei faamasinoga.
