Luka 2:7, “Ua fanau e ia lana tama ulumatua, ua ia aui ia te ia i le ie, ma faataoto ia te ia i le fale povi, aua latou te le ofi i le fale e tali ai malo.”
Faapefea na leai se potu o le faletalimalo mo le Tupu o Tupu? Faapefea na leai se potu se‘i alalaa ai le Atua o le foafoaga? Faapefea na ave le faamuamua i isi, ae faasino i le fale povi? Ua tumu le fale ma teena Iesu, ae o Ia, na faia mea uma?
O le ā sou manatu, ae e alu atu i lou fale, o oe e ana, ae oso mai se tagata ese ma faapea mai, malie lau susuga e saili se fale e te mapu i ai ua leai se potu o avanoa? Masalo e te osotu i lugā, faataitaiō ma fai se finauga lē pūpūlua ma ē ua tumuvale ai lou fale. Masalo e te lalau lenei ma lenā ma folafola lau pule. O Iesu e leai.
E oo mai i lenei kerisimasi, e lei suia lava lea vaaiga faanoanoa, leai o se potu mo Iesu. O loo atagia pea lava le tali, “Faamalie atu, ua tumu le fale e tali ai malo, ae saili atu i le fale o manu, masalo o iai se avanoa.”
O le leai o se avanoa o Iesu i le tele o soifua o tagata, o se faanoanoaga sili ona tuga i le Atua na ia auina mai lona Alo mo le lalolagi. Ua tumu saisai olaga i isi mea, ua tutumu potu i mea o le lalolagi nei, ae leai se potu e faaavanoa se‘i afio ai le Tupu o Tupu ma le Alii o Alii. Seiloga foi e puapuagatia, ona tau faaavanoa lea o se polotito mo ia. Seiloga e iai ni manaoga, ona tatalo lea faatauanau, ae a sologa lelei foi, ua faatuatuanai ma lē amanaina le Atua.
Sa ou faia le faaipoipoga a se isi ulugalii laiti mai se isi ekalesia. Sa faufautua i ai ia fai ni a la tatalo e fesoasoani tele i le tau amataina o lo la aiga, ae tali mai, e leai se taimi e tatalo ai, e tele feau ma e pisi i galuega. Sa ou fesili i le tamaitai, pe faafia ona tausami i le aso. Sa tali mai, e faatolu pe faafā.
Ou fai i ai, e faapefea na e fai mai e te pisi, ae maua le taimi e te ‘ai ai faatolu pe faafā, ae leai se taimi e tatalo ai? O le faanoanoaga lea ua taatele i aiga, ua pisi solo i isi mea, ae ua leai se taimi e fai ai ni faigalotu ma le fanau, pe fai se fonotatalo e talosia ai aiga ma le lumanai o fanau.
Ae ā lenei Kirisimasi? E mafai na tatala lou loto se‘i faaafio ai le Alii o le Kirisimasi? A o tatou sauni e savalia le tausaga fou, ou te manatu o se filifiliga tatau ma le tāua mo oe ma lou aiga, le tautai e Iesu o lau folauga mo le 2012 ma ia tuta manuia i le Kirisimasi o le tausaga fou.
I le misiona a Iesu, e tau lē maua se paganoa e mālōlō ai. Ae o taimi uma e fetuleni ane ai le motu o tagata, na te lē talitualimaina. Poo ā manaoga, faamaloloina o latou ma‘i ma tiga, e tali lava e le Alii o le ola.
E lei faapena ane, ua pisi, leai se avanoa. Ina ua lolofi ane tamaiti, sa faaseā Peteru ma faapea, soia le faalavelave i le matai.
O le tali a Iesu, aua le vavao ia te i latou, tuu mai e omai. E oo lava i le taimi o ona puapuaga, na ia silafia ua taupulepule le au faresaio ia fasioti o ia, ae lei tuua ai le misiona alofa. Sa galue pea ma faamalolo ina ua latou o ane (Mataio 12:14-15).
A o tautau ai i luga o le satauro, sa ia ofoina ane le avanoa e faaolaina ai le isi pagota. E lei iai se taimi sa maumauina e faameo ai. Poo le ā sou manaoga, poo se mea o e pologa ai, afai e te valaau atu ia te ia, e tali mai.
E liliu mai ona fofoga i lou valaau atu. Na ia faataatia i lalo lona lava soifua mo oe ma a‘u. Ua ia ave a tatou agasala, ae aumai ia tatou lana amiotonu.
Ua ia ave le mativa, ina ia faatamaoaigaina tatou. Ua ia faatau i tatou i lona toto, ina ia lē toe tagataese i tatou, ae ia fai ma suli o le Atua, o suli lava faatasi ma Ia. Ua maliu ma alu i Seoli, ina ia e oti ma e alu i le lagi. Se alofa inā uigaese!
Faamanuiaga o le Kirisimasi!
Faamanuiaga o le Kirisimasi mo latou uma sa faaavanoa taimi e faitau ai nei Luitau. Faafetai mo faamanuiaga ma le tatalo, faafetai mo fautuaga e faaleleia atili ai lenei auaunaga. Ua outou natia le tamatama o tusitusiga ma ufiufiā manugase aleu ona o le titifaitama.
Faamanuiaga mo le pulega o le Samoa Times ma le Radio Samoa ona o le auaunaga le faatūaoia mo Samoa o alaala i atunuu i fafo. Faamalo fai o le faiva. Faamanuiaga mo le alaleo a le Siuleo o le Samoa na Galo (Ausetalia), faamalo tautua.
Faafetai i le J.J. Recording Studio, susuga Faatasi ma Irene Sanerivi mo le tapueina o Luitau.
Faafetai i la matou Ekalesia le nofo tatalo, faafetai le aumai o lo outou faatuatuaga i le vaivai, e uli lo tatou sa, ae faatonutonu mai e le Atua. Faafetai si ou toalua ma si au fanau le lagolagosua i lo tatou valaauina mai le Atua. Manuia le Kirisimasi, aemaise le aga atu mo le tausaga fou.
Taitai atu lo outou soifua ma lo matou ola i lena tausaga fou, e faauau ai pea le tautua ma le tatou Luitau, e faamanūina ai pea le suafa o lo tatou Alii o Iesu Keriso. Soifua.
