Ua i luma nei o le Palemene le tulafono taufaaofi e faatū ai le Komisi o le gagana Samoa, ma o le tauaofiaga faaiu a le fono aoao faitulafono o le a toe usuia i le aso 18 o Tesema 2012, o le a faitauina faalua ai ai ma soalaupule loa e le sui mamalu o le Palemene o le malo tutoatasi o Samoa.
O se taumafaiga lea a le Matagaluega o Aoga, Taaloga ma Aganuu, ua talia e le Malo i le faanaunauga e toe lalaga le faaolaolaina o le gagana Samoa, ona ua tele molimau ua faamautu ai le solo i tua o le gagana a le atunuu ona o le tele o suiga fou. Na faailoa e le pule sili lagolago o le matagaluega, le faletua o Doreen Tuala Roebeck, lea tulaga i se feiloaiga ma tusitala i le vaiaso ua mavae.
O lana saunoaga ua manu‘a le gagana Samoa ona o le faaaogāina o le tele o upu o le gagana peletania, lea ua faigofie ona liliu sa‘o lava i ai se upu o le gagana i le aitalafu o le upu faapeletania ona maua ai lea o le upu fou o le gagana Samoa.
O se faiga ua lē talafeagai ona ua paie ai le mafaufau e saili le upu tonu e faaliliu i ai, aemaise lava pe a faaliliu mai i le gagana peletania i le gagana Samoa.
O le gagana tautala foi ua molimauina le iai o ona suiga tetele ona o le faaaogā foi o le faiga lea ma ua tele foi ina fefiloi le tautala i le gagana Samoa ma faaopoopo i ai ma upu peletania.
O le komisi o le gagana Samoa o le a tofia ai se taitaifono ma ona sui e nafa ma le galuega o le sailia o auala uma e mafai ona togafiti ai le gagana a le atunuu, ina ia mafai ona toe faaolaola pea i le tulaga sa iai aemaise o le a faamalosia ai le faaaogāina o faailoga e pei o koma liliu, faamamafa, ma isi faailoga e iloa lelei ai e fanau le faaleoga o se upu.
O le molimau a le tamaitai pule sili lagolago, ua lē lelei le faaleoga o upu o le gagana e fanau ma nisi e matutua, ona ua leai ni faailoga e tuu i upu e tatau ona faaleo sa‘o ai lona ta‘uga.
O le taumafaiga a le Malo e ala mai i le matagaluega o aoga o loo iai le talitonuga e tatau ona tulai mai ai ni suiga lelei i le lumanai, aemaise lava o le faamemelo o le toatele i le gagana Samoa ua tauau lava ina malepe ma masofa ma lē toe iai sona tāua, ona ua saoasaoa suiga o le olaga, ma ua nini faatasi ai le gagana peletania a le papalagi ma le gagana e faapelepele i ai tuaa ma mātua ua folau i le nuu e galo ai mea uma faigata o le soifuaga.
