O le nuu o Samamea i Fagaloa le nofoaga na tupu ai se isi faalavelave lata mai e aafia ai se laau malosi ona o le talitonuga o leoleo o le faatamala o lē na tauaveina le a‘upega. O se fanaga pe‘a na alu, sa o ai le tamā o le tamaitiiti 5 tausaga le matua ma sona tausoga, ma se isi tamaitiiti e tai tupulaga lava ma lē ua uma le ola.
Fai mai le faamatalaga a le molimau na faaooina mai le faalavelave i le tusitala o lenei nusipepa e faapea, na alu le fanaga pe‘a ona taunuu lea i se tasi o nofoaga, ona alu lea o le tamā o le tamaititi e ta ane se amo, ae faataatia le laau malosi i se tasi o vaega o le fanua na taunuu i ai.
O le taimi lea na oo ai le tamaitiiti 5 tausaga i le fana ma ia tagofia lea e faapea o laua ma le isi tamaitiiti na latou o. Na faafuasei ona pa le fana ma lavea ai foliga o le tamaitiiti ma uma ai lona ola. E leai se taumafaiga vave na saofia ona e ogaoga le lavea o le alualutoto e pei ona faaalia e le molimau.
Faaalia e leoleo o le faalavelave e foliga na tupu ona o le faatamala o le tamā o le tamaitiiti i le vaaiga o le a‘upega. Peitai o se isi lea o faalavelave e aafia ai se laau malosi ua toe tulai mai ai se fesili tele i le numera o laau malolosi o loo umia e le atunuu, aemaise lava o laau malolosi e lē o laiseneina faaletulafono atoa ai ma ni a‘upega e faasā ona faaulufale mai i le atunuu ae o loo umia e nisi i se tulaga solitulafono.
Talu ai nei na faaalia ai e le Komesina lagolago le afioga Leaupepe Fatu Pula, o loo silasila le matagaluega i le faia o se polokalame e valaau ai ia i latou o umia fana solitulafono e faafoi atu e aunoa ma le faia o ni moliaga faasolitulafono poo se gun amnesty.
O le lua vaiaso talu ai na faailoa ai e le komesina lagolago lea tulaga ina ua fesiligia i le tulaga o iai le umia o a‘upega e nisi o le atunuu, ona o nisi o faalavelave sa tutupu ma maliliu ai ni tagata ona o laau malosi e lē faatagaina ona faaulufale mai i Samoa.
O ni osofaiga foi a leoleo i suesuega o laau ma pauta faasāina na maua ai ni laau malolosi, ma o se isi lea popolega tele i le faatupulaia pea o solitulafono faapea, ae aafia ai ma laau malosi. O loo tālia pea se gaioiga a le matagaluega o leoleo ma falepuipui poo afea e faatino ai se polokalame e faafoi atu ai laau malolosi solitulafono.
O loo talosia ia mafai ona maua uma ai ia ituaiga o a‘upega, ae o le itu mautinoa ailoga a maua uma ai auā o nisi lava o tagata o umia e lē mafai ona latou faailoa a‘upega poo laau malosi o loo latou umia ona sa aumai i le atunuu i ni auala lē talafeagai ma solitulafono.
O le mau a le pulega o le matagaluega o tupe maua o loo iai ma le ofisa o le tiute o loo vaaia uafu ma malaevaalele i oloa ma uta e faaulufale i le atunuu, o loo malupuipuia nofoaga nei ae peitai o le molimau a le komesina lagolago, o loo iai lava masalosaloga o loo auala mai nei a‘upega i nisi faiga e lē o mafai ona mataitu ma iloa e le vaega o le tiute.
