O le masina o Mati o le tausaga fou, 2011 ua faamoemoe e tatala ai le maketi fou i Vaitele-tai i le nofoaga ua faapitoa i falegaosioloa ma isi ituaiga o pisinisi (Industrial Zone).
O se atiina‘e ua tulimatai e nisi o lo tatou atunuu o loo foufou e latou te lisiina poloka ma faleoloa laiti i lea maketi auā taumafaiga o pisinisi mo le tausiga o aiga, nuu ma ekalesia, ae o le sini autū ia maua nisi seleni faaopoopo e fesoasoani i aiga i Samoa.
O se tasi lea o atina‘e a le Malo na fuafua mai i le amataga o le paeaiga o iai nei a le Palemene, ina ua mae‘a ona umusa ma tatala le maketi fou i le taulaga i Salelologa i Savaii.
O le faamoemoe ia mafai ona vavae mai se isi vaega o le au faifaatoaga ma le atunuu e faia ni pisinisi i le maketi i Vaitele-tai.
O se avanoa lelei e faigofie ai faatauga a le toatele o le atunuu ua alaala nei i vaega o Vaitele-uta ua faatau ai fanua umia saoloto.
O se fuafuaga e tuu itiitia ai le lolofi tasi atu i maketi i Fugalei o loo i le taulaga autū o le atunuu i Apia, faapea le maketi tuai i Savalalo lea ua avea ma nofoaga e faia ai pisinisi e pei o poloka e faatau ai lavalava ma nai faleoloa laiti ma poloka o iai faleaiga o taumafa eseese.
Ua tele nisi o pisinisi ua faatutū nei i Vaitele-tai, e pei o faleoloa tetele ma faleaiga, ma ua iai le talitonuga a oo nei ina tatala ma amata faaaogā le maketi ua fausia ai, o le a faapea foi ona tumutumu i ai le atunuu faatau, aemaise o le a iai se isi nofoaga e agai i ai tagata e faia ai a latou filifiliga saoloto i oloa e mananao ai, aemaise foi o oloa tau faatoaga.
E mamao tele foi nisi o nuu ma afioaga o loo autovaa i Fugalei e faatau ai fua o a latou faatoaga, ae o le a latalata ane le maketi i Fugalei mo i latou ma tuuitiitia ai tupe alu, ma le taimi o feoaiga.
Ua faaalia mai e le tamaitai pule sili o le Faalapotopotoga o Eleele a le Malo o loo iai le vaaia ma le pulea o maketi le afioga Peseta Afoa Arasi Tiotio, ua iai i latou ua talosaga atu mo ni avanoa e lisi ai faleoloa laiti mo le maketi i Vaitele-tai. E faapea foi i poloka o le a iai pisinisi tau lavalava ma meaai.
