“Ou te usitai i le finagalo o le itumalo e lagolago le HRPP”
O Aiga i le Tai o se tasi o itumalo faafaipule e ‘oa lona laueleele i faatoaga faapea le gataifale i i‘a ma figota. Peitai e iai vaega o loo faaletonu ma e lē o sologa lelei ai le soifuaga o aso uma mo tagata o le itumalo e faasino lea i aiga o alala i Manono-tai.
Ua ioe le susuga Leiataualesa Filimaloata Niuapu Faaui II, o se sui tauva mo le palota o le tausaga fou 2011, o le suavai taumafa o loo mafatia ai nuu ma afioaga o le motu o Manono. “O le tasi lena galuega tele o le a ou agai i ai pe a filifilia a‘u e le itumalo i le tofi faipule o Aiga i le Tai. O le eletise foi e fia faaoo i uta i le vaega maualuga o le motu ua see i ai le toatele o aiga e faamautu ai”. O tali tuusa‘o ia a le susuga Leiataualesa ina ua fesiligia i ana tapenaga o le palota.
O ia o se tasi o tamalii o loo galue nei i le Matagaluega o Faamasinoga o loo faauluulu i ai le ofisa o le au pasiata tifaga ma ata video a le Malo o Samoa. A o lei see atu i lea tulaga sa faauluulu ia te ia le vaega e faatoai i ai mataupu i le tausiga o tina ma fanau. Le vaega lea o le tautua a le Matagaluega o Faamasinoga o loo sulufai i ai tina mo le totogiina o a latou fanau faapea foi le itupa o tamā e fia talosaga e totogi ia ma tamaiti pe a ua fai se isi aiga fou o le tina.
Ua 50 tausaga o lona soifua, ma o se tasi sa ola ma soifua mai i se aiga tau atina‘e e pei ona ia faamatala.
“O lo‘u agaga atoa o le fia faia o so‘u sao e tautua ai le itumalo e ala i le tofi faipule, ou te iloa foi o lo‘u taimi nei lenei”. O le soifua maloloina o le tasi lea vaega tāua o loo fia faia i ai se sao o le sui tauva o le HRPP, talu ai ua lē toe iai se falemai i Manono ae ua agai uma ane i Mulifanua poo le faaauau mai i Leulumoega ma taualuga ai se siiga gasegase mai le itumalo i Motootua.
“Tasi lea vaega faigata o loo feagai ma si ou itumalo aemaise lava i a Manono ma Apolima o le tau mamao i uta o le falemai, ma ua lata i le 20 tausaga e lei toe iai se falemai i Manono tai ona ua toagaogao foma’i ma teine tausi soifua”.
Ua faailoa e Leiataualesa afai e filifilia o ia o le tasi lea vaega o le a ia taumafai e toe faaleleia ina ia faigofie mo i latou o alala i Manono ma Apolima-tai.
Ua faamemelo le finagalo o le sui tauva, maumau pe ana faapea o toe tumau lava le faatamalii o faaiuga sa iai le filifiliga o le tofi o le itumalo i tausaga ua mavae i taimi o matua ma tuaa ua fai i lagi le folauga.
Saunoa Leiataualesa sa faasolo le tofi, ma ua ia faaalia o le a taumafai e toe ma faafoi i lea tulaga mamalu ma tamalii pe a manumalo.
O ia o le sui tauva mautinoa o le HRPP ma ua mae‘a ona momoli i le vaega faaupufai.
O loo iai le talitonuga e toafā sui o le a tauva mai Aiga i le Tai, e aofia ai sui e toalua mai Mulifanu le susua Lofipo Filisi ma Taimalelagi Na‘otala, ae o Manono e toalua foi o le sui faipule o loo iai nei afioga Mulipola Oliva ma Leiataualesa Filimaloata Niuapu Faaui II.
O loo faatalia nei se finagalo o le HRPP i le momoliina atu o le afioga Mulipola Oliva pe talia e tauva i le fu‘a a le vaega faaupufai.
