O le agaga fiafia lava e lauiloa ai le faaili a le Fiafia Band a o faagasolo ai ana faafiafiaga i laufanua o Brisbane i le faaiuga o le vaiaso. O le afioga ia Taulapapa Sanele Pauli o loo taitaia mai le aufaaili faatasi ma le pulega a le Fiafia Band.
Na faafiafia i le itu i Matu i le po o le Aso Faraile ae o le po o le Aso Toonai sa faafiafia ai i le aai o Wacol i le itu i Sisifo o Brisbane. Talu ai ona o le toatele a o le aueva ma le fia faafofoga pea i fatufatuga a le Fiafia Band mai Niu Sila, o lea ua a‘e ai se tofa i le alii pule o le a toe faafiafia i le po o le Aso Faraile 21 o Mati i Sveti Nikola Hall, 48 Bandara St Richlands, Wacol. O le Aso Toonai, 22 o Mati o le a toe asiasi ai i le itu i Matu.
E na o le $20.00 le ufufale mo lenei faafiafiaga. O le susuga ia Chris Tupu Tuia ma le kamupani a le Digicel o loo lagolago malosi i le faamoemoe o le Fiafia Band a o iai i Brisbane. O le tuatusi o le a faia ai le faafiafiaga o le Deception Bay Community hall, Corner Ewart St & Bayview Tce, Deception Bay.
