O le faamatalaga lea a le faiaoga ma le Peresetene o le Asosi siisii uamea mamafa a Samoa, le afioga Tuaopepe Jerry Wallwork, ina ua maua mai le faamaoniga, o se tasi o sui o le ausiisii a le atunuu, Nevo Ioane o lea ua ave i ai le pine auro o sailiga siamupini o lea taaloga na fai i le faaiuga o le tausaga na tea nei i Meleisia. O le vaega o tausinioga a Malo o le Taupulega lea ua iai le suiga lea, ma na manumalo Ioane i le pine siliva i le mae‘a ai o lea tausinioga, o le siisiiga i le mamafa o le 62 kilokalama i le vaega o alii. O le alii Meleisia na manumalo i le pine auro.
O le faamatalaga a le Asosi Siisii a le Lalolagi o lea ua faatoa faamautu mai suesuega na faia ma faamaonia ai o le alii Meleisia o Amirul Hamizan Ibrahim na ia faaaogā le fualaau faamalosi tino o le steroids i le taimi na faagasolo ai lenei taamilosaga. O le vaiaso lea ua tea na faalauiloa mai ai loa ua faasala le alii Meleisia ia Ibrahim ma e lua tausaga ua faasā ai ona toe tausinio i le taaloga o le siisii uamea mamafa. O le mau a le alii faiaoga o le sailiga na faia i le taimi o le tausinioga sa tatau lava ona vave maua ai lea faaiuga, ae o lea ua toeititi oo i le taimi o taaloga a Malo o le Taupulega ae o lea faatoa maua mai lea faaiuga. “Sa tatau lava ona malo i le pine auro Nevo i le taimi lea,” o le faaaliga lea a Tuaopepe. Faaalia e le alii faiaoga o le faafitauli tele lava lenei i lenei taaloga, o le toatele ua tagofia fualaau faasāina e tau saili ai le malosi. “E matuā lē fea (fair) lava i autaaalo ia e tigaina e koleni i taimi uma ae e lē faamanuiaina lava,” o le saunoaga lea a Tuaopepe.
O le faaaliga a le alii faiaoga, o le tulai mai o lenei suiga, e manino ai foi le tele o le sauniuniga e tatau ona feagai ma Ioane ina ia mautinoa e tumau i le pine auro lea ua tuu atu ia te ia, ma o le faaaliga a le alii siisii ua faamanuiaina nei, o le sauniuniga lea o le a agai i ai ma o le a matau foi, poo fea o le a agai i ai nei suiga ma taumafaiga a isi sui i le pine auro o le mamafa lea, o le 62 kilokalama i le tausinioga a alii. O le masina o Iulai e faatautaia ai taaloga a Malo o le Taupulega.
